Yapı Kredi Bank Azərbaycan” 2018-ci ilin birinci yarısı üzrə maliyyə hesabatını açıqlayıb.

AZXEBER.COM xəbər verir ki, bank 6 ayı 1 milyon 401 min manat xalis mənfətlə başa vurub.

Halbuki bank, 2017-ci ilin birinci yarısını 3 milyon 286 min manat xalis mənfəətlə bağlamışdı.

Başqa sözlə, bankın qazancı 2,3 dəfə və yaxud 1 milyon 885 min manat azalıb.

"Yapı Kredi Bank Azərbaycan”ın faiz gəlirləri ötən ilin yanvar-iyun dövrünə nisbətən 1,6% artaraq 16 milyon 926 min manat təşkil edib. Qeyri-faiz gəlirləri isə ötən ilin yanvar-iyun dövrünə nisbətən 36,5% azalaraq 8 milyon 493 min manat təşkil edib. 2017-ci ilin ilk 6 ayında 13 milyon 380 min manat qeyri-faiz gəlirləri əldə etmişdi.

Müqayisə olunan dövrdə "Yapı Kredi Bank Azərbaycan”ın faiz xərcləri 4 milyon 753 min manatdan 2 milyon 692 min manata, qeyri-faiz xərcləri isə 16 milyon 861 min manatdan 15 milyon 91 min manata düşüb.

Son bir ildə "Yapı Kredi Bank Azərbaycan” 111 milyon 164 min manat və ya 21,5% kiçilərək cəmi aktivləri 406 milyon 825 min manata düşüb. Bank 30 iyun 2018-ci il tarixində 517 milyon 989 min manat cəmi aktivlərə malik idi. Bankın müştərilərə verdiyi kreditlər 175 milyon 546 min manatdan 161 milyon 262 min manata geriləyib.

"Yapı Kredi Bank Azərbaycan”ın banklar da daxil olmaqla, maliyyə institutlarındakı depozitləri 3,1 dəfə artıb. Ötən ilin iyun ayının sonunda 46 milyon 346 min manat təşkil etmiş depozitlər 2018-ci ilin İyun ayında 145 milyon 922 min manata çatıb.

2017-ci ilin birinci yarısı ilə müqayisədə cari ilin birinci yarısında "Yapı Kredi Bank Azərbaycan” ın depozit portfeli 19% azalaraq 307 milyon 39 min manata düşüb. Hüquqi şəxslərin tələbli depozitləri 266 milyon 650 min manatdan 197 milyon 792 min manata, fiziki və hüquqi şəxslərin müddətli depozitləri 78 milyon 35 min manatdan 71 milyon 602 min manata geriləyib.

30 İyun 2018-ci il tarixində "Yapı Kredi Bank Azərbaycan” 65 milyon 750 min manat məcmu kapitala malik olub.

Rəqəmlərdən görünür ki, bir çox banklar kimi,"Yapı Kredi Bank Azərbaycan”ın kredit portfeli, gəlirləri azalmaqda davam edir. Bankda ehtiyatlara ayırmalar da başa çatmayıb. "Yapı Kredi Bank Azərbaycan” xalis mənfəət əldə etsə də, kəskin azalıb. Bütün bunlar əməliyyat şəraitinin çətinliyinə işarədir.

Bankın tam hesabatı ilə bu linkdən tanış olmaq olar: