Bakı, 9 avqust — Azadmedia.az


Politoloq Ülkər Piriyeva Vaşinqton razılaşması ilə bağlı Azadmedia.az saytına açıqlamasında bildirib ki, bu saziş Cənubi Qafqazda uzun illərdən sonra əldə olunmuş ən mühüm diplomatik irəliləyişdir. O vurğulayıb ki, razılaşma yalnız Ermənistan və Azərbaycan arasında müharibənin dayandırılması ilə kifayətlənməyib, həm də regionun geosiyasi və iqtisadi xəritəsinin yenidən formalaşmasına yol açıb.

Ülkər Piriyeva qeyd edib ki, ABŞ-ın Zəngəzur dəhlizinin idarəsində iştirak etməsi regional güc balansında ciddi dəyişikliklərə səbəb olur və Moskvanın ənənəvi nüfuz dairəsinə açıq meydan oxumaqdır. Eyni zamanda, bu saziş Azərbaycan üçün strateji əhəmiyyət kəsb edir, çünki Naxçıvanla birbaşa quru əlaqəsinin təmin olunması ölkənin geoiqtisadi imkanlarını genişləndirir və təhlükəsizlik zəmanəti yaradır.

Politoloq əlavə edib ki, razılaşmanın uğurlu icrası üçün şəffaflıq, daxili siyasi konsensus və regional güclərin maraqlarının balanslaşdırılması vacibdir. Əks təqdirdə, bu sənəd sadəcə kağız üzərində qalmaq riski ilə üzləşə bilər..

Politoloq Piriyeva xüsusi olaraq qeyd edib ki, Prezident İlham Əliyevin bu razılaşmadakı rolu Azərbaycan diplomatiyasının və siyasi liderliyinin nümunəvi təcəssümüdür. O, həm müharibədən sonra yaranan mürəkkəb regional reallıqları uğurla idarə etmiş, həm də Azərbaycanın geosiyasi mövqeyini gücləndirərək böyük güclərlə balanslı əməkdaşlıq qurmağı bacarmışdır. İlham Əliyevin strategiyası nəticəsində Azərbaycan yalnız bölgədə sülhün təminatçısına çevrilməklə qalmayıb, həm də öz milli maraqlarını maksimum səviyyədə təmin etmişdir.