Ukraynanın məktəblərində rus dilini qadağan etmək mümkün deyil, çünki bu, Avropa İttifaqının normalarını pozur. UkraNews xəbər verir ki, bu barədə Ali Radanın təhsil komitəsinin rəhbəri Sergey Babak bildirib.

"Ukraynanın Aİ-yə daxil olmaq istəyini, həmçinin Venesiya Komissiyasının tövsiyələrini və Aİ-nin ayrı-ayrı üzv dövlətlərinin tələblərini nəzərə alaraq, biz təhsil qanunvericiliyində ana dillərin istifadəsinə qadağa qoya bilmərik", - Babak deyib.

O qeyd edib ki, belə bir norma diskriminasiya sayılacaq və Ukraynanın Avropa İttifaqına daxil olmasını çətinləşdirəcək.

Fevral ayında Ukraynada rusdilli mahnıların qadağan edilməsini tələb edən petisiya lazımi 25 000 imza toplamışdı.

Petisiya Ukrayna hökumətinin saytında fevralın 17-də dərc edilib. Onun müəllifi məşhur “Apple Music”, “Spotify” və digər striminq xidmətlərində rus dilində mahnıların, o cümlədən ukraynalı ifaçıların bloklanmasını təklif edib. O, iddia edib ki, rusdilli musiqiyə qulaq asmaq “təcavüzkarı maliyyələşdirir”.