Azəriqaz İstehsalat Birliyinin rəhbərliyi tərəfindən işçilərə təqdim edilən Fəxri Fərmanlarda "Həmkarlar Təşkilatı hərəkatında fəal iştirak edir" ifadəsi yer alır. Ancaq sual yaranır: bu fəallıq nədən ibarətdir? Həmkarlar ittifaqı həqiqətən işçilərin əmək hüquqlarını qoruyur, yoxsa fəaliyyəti əsasən formal tədbirlərlə məhdudlaşır?

Əmək qanunvericiliyinə əsasən, həmkarlar ittifaqları işçilərin sosial-iqtisadi hüquqlarının müdafiəsində, əmək qanunvericiliyinə əməl olunmasına ictimai nəzarətin həyata keçirilməsində mühüm rol oynayır. Bununla yanaşı, işçilər hər ay əməkhaqlarından həmkarlar ittifaqına üzvlük haqları ödəyirlər. Bu vəsaitlər təşkilatın əsas maliyyə mənbələrindən biridir və təbii olaraq həmin vəsaitlərin necə xərclənməsi barədə şəffaflıq gözlənilir.

Məhz bu baxımdan 13 iyun 2026-cı il tarixində Azəriqaz İB-nin Həmkarlar İttifaqı tərəfindən Qarabağa təşkil edilən turla bağlı səslənən narazılıqlar diqqət çəkir. Rəsmi məlumatda bildirilib ki, turun bütün xərcləri həmkarlar ittifaqı tərəfindən qarşılanıb və paketə nəqliyyat, səhər, günorta və axşam yeməkləri daxildir.

Lakin tur iştirakçılarının sözlərinə görə, vəd olunan xidmətlər tam həcmdə göstərilməyib. Onların iddiasına əsasən, yalnız günorta yeməyi təqdim olunub. Verilən yeməyin də kifayət qədər olmadığı, menyunun bir qədər kartof, bir neçə ədəd cücə qanadı, salat və yarım litrlik sərinləşdirici içkidən ibarət olduğu bildirilir. İştirakçıların sözlərinə görə, hətta çay belə təqdim edilməyib.

Qeyd olunur ki, təkcə Lənkəran Regional Qaz İstismarı İdarəsindən təxminən 50 nəfər işçi bu turda iştirak edib. Onların narazılığı vəd edilən xidmətlərlə faktiki təqdim olunan xidmətlər arasında ciddi fərqin olması ilə bağlıdır.

Əgər bu iddialar doğrudursa, məsələ təkcə bir turun təşkilindəki çatışmazlıqdan ibarət deyil. Söhbət işçilərin ödədiyi üzvlük haqlarının necə xərclənməsindən, həmkarlar ittifaqının hesabatlılığından və işçilərin etimadının qorunmasından gedir.

Azəriqaz İB-nin Həmkarlar İttifaqı səsləndirilən bu iradlara münasibət bildirməli, turun maliyyə xərcləri və göstərilən xidmətlərlə bağlı ictimaiyyətə aydın izahat verməlidir. Çünki həmkarlar ittifaqının əsas missiyası yalnız tədbirlər təşkil etmək deyil, ilk növbədə işçinin hüquqlarını qorumaq və onun etimadını doğrultmaqdır.

Qeyd: Məqalədə Hüquq müdafiəçisi Mirvari Qəhrəmanlının sosial mediada paylaşımından istifadə edilib
https://www.facebook.com/share/r/18kagYZLhn/