Azərbaycanda işğaldan azad edilmiş ərazilərdə mina təmizləmə işləri davam edir. Azərbaycan Minatəmizləmə Agentliyinin (ANAMA) məlumatına görə, 16–21 iyun tarixlərində həyata keçirilən əməliyyatlar zamanı ümumilikdə 1 710,16 hektar ərazi minalardan və partlamamış hərbi sursatlardan təmizlənib.

Bir həftə ərzində mütəxəssislər 29 ədəd tank əleyhinə mina, 84 ədəd piyada əleyhinə mina və 514 ədəd partlamamış hərbi sursat aşkar edərək zərərsizləşdiriblər.

Mina təmizləmə əməliyyatları ANAMA ilə yanaşı, Azərbaycan Müdafiə Nazirliyi, Fövqəladə Hallar Nazirliyi, Dövlət Sərhəd Xidməti və dörd özəl şirkətin birgə iştirakı ilə işğaldan azad edilmiş ərazilərdə davam etdirilir.