Fələstin hökumətinin Qəzzadaki Media Ofisi, İsrail ordusunun son 20 gündə Qəzzə zolağına etdiyi hücumlarda 1350 Fələstinlinin şəhid olduğunu, qurbanların 490-unun uşaq olduğunu açıqlayıb.

AzadMedia.az xəbər verir ki, açıqlamada, İsrailin mülki əhaliyə qarşı hava və yer hücumlarının davam etdiyi, xüsusilə uşaqlar, qadınlar və yaşlıların hədəf alındığı qeyd edildi. Onlarla ailənin tamamilə məhv edildiyi, evlərin xarabalıqları altında insanların diri-diri basdırıldığı ifadə olunub.
"Bu, bir soyqırımdır!"
Fələstin Media Ofisi, İsrailin Fələstin xalqına qarşı "soyqırım savaşı" apardığını və beynəlxalq hüququn kobud şəkildə pozulduğunu vurğulayaraq, dünya ictimaiyyətini təcili tədbir görməyə çağırdı.
"Bu, unudulmayacaq qara bir səhifədir. Uşaqların məktəbləri, xəstəxanalar və məscidlər bombalanır, ailələr yox edilir. Beynəlxalq təşkilatların səssizliyi isə bu vəhşətə göz yummaq deməkdir." - deyə açıqlamada deyilir.
Son sutka ərzində azı 32 nəfər öldürülüb, onlarla insan yaralanıb.
İsrailin son hücumları İsrail Baş naziri Binyamin Netanyahununun ABŞ prezidenti Donald Tramp ilə görüş üçün ABŞ-yə yola düşdüyü vaxta təsadüf edib.
İsrail keçən ay Hamasla atəşkəsi pozaraq yeni girovlar müqaviləsi üçün təzyiq göstərmək məqsədilə ərazi işğalını genişləndirib. Artıq bir aydan çoxdur ki, Qəzzəyə ərzaq, yanacaq və digər humanitar yardımların girişi qadağan edilib.
Bazar günü axşam saatlarında Qəzzədən atılan 10 raketdən sonra İsrail ordusu Deyr əl-Balahın bir neçə məhəlləsində yaşayan əhalinin təxliyəsini tələb edib. Bu, müharibənin bərpasından bəri ən böyük raket hücumu hesab olunur. İsrail tərəfi raketlərdən 5-nin müdafiə sistemləri tərəfindən vurulduğunu bildirib. Hamasın hərbi qanadı isə bu hücuma görə məsuliyyət daşıyır.
Fələstin tərəfi, BMT, İslam Əməkdaşlıq Təşkilatı (İƏT) və digər beynəlxalq qurumları təcili müdaxilə etməyə və İsraili cinayətlərindən görə məsuliyyətə cəlb etməyə çağırıb.
Humanitar böhran: Qəzzədə elektrik, su və dərman çatışmazlığı getdikcə dərinləşir.
Dünya səssiz qalır: ABŞ və Avropa Birliyi kimi güclər İsrailə açıq dəstək verir.
Etirazlar genişlənir: Dünyanın bir çox ölkəsində Fələstinə dəstək nümayişləri keçirilir.
İsrail hücumları dayanmır, qurbanların sayı artır. Beynəlxalq ictimaiyyət səssiz qaldıqca, Fələstin xalqının faciəsi dərinləşir.