Dnestryanı bölgənin xarici işlər naziri Vitali İqnatyev Moldova hakimiyyətinin tanınmamış respublika ilə bağlı işlətdiyi aqressiv ritorikadan narahatlığını bildirib.

O, ATƏT-in Benderidəki missiyasında Moldovanın baş nazirinin müavini Oleq Serebryanla görüşündən sonra mediaya açıqlamasında deyib: "Moldovada Dnestryanıya və bizim iqtisadi qurum və müəssisələrimizə münasibətdə aqressiv ritorikadan geniş istifadə olunur. Bu, dialoqa mane olur. Biz bu məsələni dəfələrlə müzakirə etmişik".

"Dnestryanı tərəf Moldova rəsmilərindən, qanunvericilərindən, həm rəsmi, həm də qeyri-rəsmi şəxslərdən, siyasətçilərdən, ekspertlərdən və hətta jurnalistlərdən eşitdiyimiz bəyanatları əks etdirən sənəd hazırlayacaq. Bunların heç biri konstruktiv dialoqa şərait yarada bilməz. Bu, anormal vəziyyətdir", - Dnestryanı telekanalı İqnatyev bildirib.

Görüş zamanı Dnestryanı nümayəndə heyəti Moldovanı ikitərəfli münasibətlərin nizamlanmasına yönəlmiş danışıqları aktivləşdirməyə çağırıb. "Biz danışıqlar prosesində nizam-intizamın vacibliyini vurğuladıq, çünki görüşlərin və işçi təmasların sayı hər ay azalıb. Moldova tərəfi dialoqdan yayınır", - Dnestryanı xarici işlər naziri qeyd edib.

Dnestr çayının iki sahili arasında gərginlik ötən il Moldova hakimiyyətinin Dnestryanıya tranzit yüklərə rüsum tətbiq etməsi ilə daha da artıb. Ukrayna 2022-ci ildə Moldova ilə sərhədinin Dnestryanı hissəsini bağladıqdan sonra mallar indi Dnestryanıya yalnız Kişinyovun nəzarətində olan ərazilərdən keçə bilər. Tiraspol Kişinyovu Dnestryanı bölgənin zəif vəziyyətindən istifadə edərək malların tədarükünə mane olmaqda və təzyiq göstərməkdə ittiham edib.