Politoloq Ülkər Piriyeva

Bakı, 19 aprel — Azadmedia.az

O yol ki, başlanğıcı kəndin dar yollarında,
sonu isə şəhidlik zirvəsində bitir.

Uşaqlıq illəri torpaqla, günəşlə, yağışla keçdi Nurlanın.
Anası Sədaqət və atası Fərrux onu sevgi ilə böyütdülər.
O, bir dənə idi…
Tək idi…
Amma bu təkliyin içində böyük bir ürək daşıyırdı –
elə bir ürək ki, bütün Vətəni sığdırmaq olurdu ora.

Amma o heç zaman “yetim” olmadı –
çünki Vətən anası oldu ona,
bayraq atasının yeri oldu,
torpaq isə yurd-yuvası!

Nurlan elə tərbiyə almışdı ki, çiynində ağır bir məsuliyyət daşıyırdı.
Əgər ana-ata sağ olsaydı,
belə oğul böyütdükləri üçün sinələri fəxrlə qabarar,
onun boyuna baxıb deyərdilər:
“Biz bu dünyadan boş getmədik!”

2020-ci ilin o müqəddəs payızı gəldi…
Zəfər ruhu boy göstərdi Qarabağ səmasında.
Və Nurlan – səssiz, təvazökar, qeyrətli bir əsgər –
silaha sarıldı.
Silahı – yalnız dəmir parçası deyildi,
əslində o, ana yoxluğunda Allaha,
ata yoxluğunda torpağa tutduğu duası idi!

Cəbhədə onun mərdliyi dillər əzbəri idi.
Dostları deyirdi:
“Biz onun gözlərində qorxu görmədik,
yalnız qərib bir sükut vardı –
sanki hansısa sirr onun içində danışırdı…”

Bəli… O sirr – şəhidliyin ona yazılmış alın yazısı idi…

Və o gün gəldi –
səma bir igidin ruhunu aldı,
torpaq isə əllərini açıb qoynunu açdı…

Nurlan şəhid oldu –
valideynlərinin yanına,
amma şəhidlik mərtəbəsi ilə getdi.

İndi o, həm yetim oğul,
həm də yüz minlərlə ana və atanın fəxri övladıdır!!!

Ey bu torpağın oğulları,
baxın Nurlanın hekayəsinə –
baxın və anlayın:
Valideynsiz böyüyən,
amma bir millətə övladlıq edən bir igidin
adıdır Nurlan!

O, bir ailənin yox,
bir xalqın himayəsinə verilmişdi sanki.
Onun şəhidliyi –
ana torpağın göz yaşları içində yazdığı səssiz şeir idi..

Ağakişibəylidə indi Nurlanın adıyla nəfəs alan küçələr var.
Qapı arxasında hələ də bir ana ətri var –
Sədaqət ananın izləri,
Fərrux atanın kölgəsi –
indi yalnız dualarda yaşayır.

Və bu duanın içində bir ad var: Nurlan
Adı nur, ruhu vəfa,
şəhidliyi isə əbədi zirvə!

Sonsuz sayğı ilə…
Şəhid Nurlanın ingilis dili müəllimi, həmyerlisi və qonşusu Politoloq/Jurnalist Ülkər Piriyeva