Türk dünyasının ilk müştərək film layihəsi ərsəyə gələcək
Azadmedia.az xəbər verir ki, bunu TÜRKSOY-un baş katibi Sultan Raev "Türk dünyası" II Beynəlxalq Tələbə Tamaşaları Festivalı iştirakçıları ilə mayın 20-də Festivalın rəsmi açılışından öncə jurnalistlərin suallarını cavablandırarkən bildirib.
Onun sözlərinə görə TÜRKSOY-a üzv ölkələrin Mədəniyyət Nazirləri Daimi Şurasının ötən ilin oktyabrında Şuşada keçirilən 40-cı iclasında qardaş respublikaların dəstəyi ilə "Molla Nəsrəddin. Çətin günlərimin dostu" adlı tammetrajlı bədii filmin birgə istehsalı qərara alınıb.
Film Azərbaycan Respublikası Mədəniyyət Nazirliyinin dəstəyi, türk respublikalarının birgə iştirakı ilə ərsəyə gələcək “Molla Nəsrəddin. Çətin günlərimin dostu” adlı tammetrajlı bədii filmin quruluşçu rejissoru Xalq artisti Vaqif Mustafayevdir.
Sultan Raev onu da qeyd etdi ki, filmin çəkilişləri yaxın aylarda Azərbaycanla yanaşı, Türkiyə, Qazaxıstan, Özbəkistan, Türkmənistan və Qırğızıstanda aparılacaq. Ekran əsəri qardaş türk xalqları arasında kinematoqrafiya sahəsində körpü rolunu oynayacaq.
Türk dünyasından tanınmış aktyorların iştirakı ilə layiqli bir ekran işinin çəkiləcəyinə əminik.
Xatırladaq ki, 20-22 may tarixlərində TÜRKSOY Beynəlxalq Türk Mədəniyyəti Təşkilatı, Azərbaycan Respublikası Elm və Təhsil Nazirliyi və Azərbaycan Dövlət Mədəniyyət və İncəsənət Universitetinin birgə təşkilatçılığı, Azərbaycan Respublikası Mədəniyyət Nazirliyinin dəstəyi ilə "Türk dünyası" II Beynəlxalq Tələbə Tamaşaları Festivalı keçirildi.
Festivala TÜRKSOY-a daxil olan dövlətlərin yaradıcı yönümlü ali təhsil ocaqlarının rektorları, nümayəndə heyətləri, eləcə də aktyor sənəti ixtisası üzrə təhsil alan tələbələr qatıldı.