Burkina-Faso hökuməti Avropa Parlamentinin ölkədə söz azadlığı və terrorizmlə mübarizə sahəsində vəziyyətlə bağlı qəbul etdiyi qətnaməyə etiraz olaraq Avropa İttifaqının səfiri Filip Bronşeni Xarici İşlər Nazirliyinə çağırıb.

Bu barədə Burkina-Fasonun xarici işlər naziri Karamoko Jan-Mari Traore məlumat verib. Nazir bildirib ki, ölkə rəhbərliyi sənəddə yer alan və daxili siyasətə yönəlmiş tənqidləri əsassız hesab edir və qətnamədən narazılığını qarşı tərəfə çatdırıb.
Traorenin sözlərinə görə, Burkina-Faso suveren dövlətdir və daxili təhlükəsizlik, eləcə də idarəetmə məsələlərinə xarici müdaxiləni qəbuledilməz sayır. O vurğulayıb ki, Avropa Parlamentinin qətnaməsi Sahel regionu ölkələrinin, o cümlədən Mali və Nigerin terrorizmlə mübarizə istiqamətində gördüyü işləri nəzərə almır.

Qeyd edək ki, Avropa Parlamenti tərəfindən qəbul edilən qətnamədə Burkina-Fasoda insan hüquqlarının pozulması, vətəndaş cəmiyyətinin fəaliyyətinə məhdudiyyətlər qoyulması ilə bağlı narahatlıq ifadə olunub. Sənəddə eyni zamanda demokratik azadlıqların qorunması şərti ilə hakimiyyət orqanları ilə dialoqun davam etdirilməsinə çağırış edilib.