Böyük Britaniyanın Uorik Universitetinin alimləri müəyyən ediblər ki, iri insanabənzər meymunlar təxminən 15 milyon il əvvəl də insanlara bənzər ritmlə gülürdülər. Tədqiqatçılar hesab edirlər ki, bu kəşf insan nitqinin təkamülünü daha yaxşı anlamağa kömək edə bilər.

Communications Biology jurnalında dərc olunan araşdırmada oranqutan, qorilla, bonobo, şimpanze və insanların gülüş səsləri müqayisə edilib. Ümumilikdə 140 gülüş epizodu təhlil olunub.

Tədqiqatın nəticələrinə görə, bütün növlərdə gülüş səsləri müntəzəm və ritmik fasilələrlə yaranır. Alimlər hesab edirlər ki, bu xüsusiyyət insanlarla insanabənzər meymunların ümumi əcdadında təxminən 15 milyon il əvvəl formalaşıb və bu günə qədər demək olar ki, dəyişməyib.

Bununla yanaşı, növlər arasında müəyyən fərqlər də aşkarlanıb. İnsanlarda gülüş daha sürətli, müxtəlif və vəziyyətə uyğun idarə oluna bilir. Digər primatlardan fərqli olaraq, insanlar həm qeyri-iradi, məsələn qıdıqlanarkən, həm də şüurlu şəkildə – söhbət zamanı nəzakət xatirinə və ya gərgin anlarda əsəbi reaksiyanın ifadəsi kimi gülə bilirlər.

Alimlərin fikrincə, səs reaksiyalarına nəzarət qabiliyyətinin inkişafı nitqin təkamülündə mühüm mərhələ olub. Daha qədim vokal ifadə forması olan gülüş isə mürəkkəb dilin formalaşması üçün zəruri bacarıqların necə inkişaf etdiyini izləməyə imkan verir.