Braziliyanın Foz do Iguaçu şəhərində yaşayış məhəllələrində görünən yaquar xüsusi əməliyyat nəticəsində zərərsiz şəkildə tutulub.

Təxminən 4–5 yaşında olduğu bildirilən erkək yaquar ilk dəfə şənbə günü şəhərin Tres Laqoas rayonunda müşahidə kameralarına düşüb. Yırtıcının küçələrdə, səkilərdə və parklarda sərbəst hərəkət etməsi yerli sakinlərin narahatlığına səbəb olub.

Mütəxəssislər heyvanın izini meşəlik ərazidə müəyyən etsələr də, yaquar ertəsi gün yenidən Jardim Sedru yaşayış məhəlləsinə qayıdıb. Bundan sonra o, sakitləşdirici preparat vasitəsilə zərərsizləşdirilərək ekoloji xidmətlərin, polis əməkdaşlarının və baytar həkimlərin iştirakı ilə təhlükəsiz şəkildə tutulub.

Təxminən 75 kiloqram çəkisi olan heyvan qoruğun baytarlıq mərkəzinə aparılıb. Burada rentgen, qan analizləri və digər müayinələr aparılıb, bel nahiyəsindəki yüngül yara müalicə edilib. Mütəxəssislər ciddi xəsarət və ya güllə yarası aşkar etməyiblər.

Yaquara tupi dilində "yolunu itirmiş" mənasını verən Tape’ỹ adı verilib. Reabilitasiyadan sonra onun GPS izləmə yaxalığı ilə təchiz edilərək yaşayış məntəqələrindən uzaq, təbii mühitə buraxılması planlaşdırılır.

Mütəxəssislərin sözlərinə görə, Braziliya, Argentina və Paraqvayın sərhədlərinin qovuşduğu bölgədə meşələrin azalması səbəbindən vəhşi heyvanların yaşayış məntəqələrinə çıxması halları son illərdə daha tez-tez qeydə alınır.