Litvada velosiped və elektrik skuter sürücülərinə nəzarət qaydaları sərtləşdirilir. 2027-ci il martın 1-dən etibarən bələdiyyələrin ictimai asayiş üzrə əməkdaşları bu nəqliyyat vasitələrindən istifadə edənlərin yol hərəkəti qaydalarına əməl etməsinə nəzarət etmək səlahiyyəti əldə edəcəklər.

Bu barədə “Delfi” məlumat yayıb.

Məlumata görə, müvafiq dəyişikliklər Yol Hərəkəti Təhlükəsizliyi haqqında qanuna edilən düzəlişlər çərçivəsində Litva Seymi tərəfindən qəbul olunub. Dəyişikliklərin lehinə 71 deputat səs verib, bir deputat əleyhinə çıxıb, altı deputat isə bitərəf qalıb.

Qanun qüvvəyə mindikdən sonra bələdiyyə administrasiyalarının xüsusi forma geyinmiş səlahiyyətli əməkdaşları velosiped, motorlu velosiped, elektrik skuter və digər elektrik mikromobillik vasitələrinin, eləcə də moped və motosikletlərin sürücülərini yoxlaya biləcəklər.

Onlara nəqliyyat vasitələrini saxlamaq, zəruri yoxlamalar aparmaq və inzibati xəta haqqında protokol tərtib etmək hüququ veriləcək.

Seymin sədri, dəyişikliklərin təşəbbüskarı Yozas Olekas bildirib ki, yeni tədbirlərin əsas məqsədi yol hərəkətinin bütün iştirakçılarının təhlükəsizliyini artırmaqdır. Onun sözlərinə görə, xüsusilə uşaqlar, yaşlılar və əlilliyi olan şəxslər ictimai məkanlarda özlərini hər zaman təhlükəsiz hiss etmirlər.

Olekas qeyd edib ki, velosiped və elektrik skuterlərin populyarlığının artması ilə qayda pozuntularının sayı da çoxalır. Ən geniş yayılmış problemlər arasında təhlükəli manevrlər, həmçinin səkilərdə və piyadalar üçün nəzərdə tutulmuş yollarda icazə verilən sürət həddinin aşılması var.

Hazırda yol hərəkətinə nəzarət və inzibati məsuliyyətə cəlbetmə əsasən polisin səlahiyyətindədir. Lakin polis imkanlarının məhdud olması səbəbindən bir sıra qayda pozuntuları qeydə alınmır və pozuntu törədən şəxslər məsuliyyətdən yayınırlar.

Qüvvədə olan qanunvericilik bələdiyyələrə yol hərəkətini təşkil etmək və infrastrukturun vəziyyətinə nəzarət etmək imkanı versə də, onların əməkdaşlarına nəqliyyat vasitələrini saxlamaq və inzibati xəta protokolu tərtib etmək səlahiyyəti vermirdi. Yeni dəyişikliklər məhz bu boşluğu aradan qaldırmağa yönəlib.