Lenovo Çində yeni simsiz oyun siçanı Lecoo Bellator GM103 modelini təqdim edib. Cihaz cəmi 59 qram çəkisi və flaqman səviyyəli texniki göstəriciləri ilə oyun həvəskarlarının diqqətini cəlb edir.

Yeni model PixArt PAW3395 optik sensoru ilə təchiz olunub. Sensor 26 000 DPI həssaslıq, 650 IPS izləmə sürəti və 50G sürətlənmə göstəricisi təqdim edir. Siçan həm USB-C kabeli, həm də 2,4 GHz simsiz bağlantı vasitəsilə 8000 Hz sorğu tezliyini dəstəkləyir ki, bu da oyunlarda daha sürətli reaksiya imkanı yaradır.

Lecoo Bellator GM103-ün ölçüləri 128 × 67 × 39 mm təşkil edir. Lenovo bildirir ki, korpusun erqonomik dizaynı müxtəlif tutuş növləri – ovuc, "claw" və barmaq ucları ilə istifadə üçün uyğunlaşdırılıb.

Əsas düymələr 80 milyon klik resursuna malik mexaniki açarlarla təchiz edilib. Bağlantı üçün üç rejim mövcuddur: USB-C kabeli, 2,4 GHz simsiz qəbuledici və Bluetooth 5.2. Bluetooth vasitəsilə eyni anda iki cihazla qoşulmaq və onlar arasında sürətli keçid etmək mümkündür.

Siçan 600 mA/saat tutumlu batareya ilə təchiz olunub. Şirkətin məlumatına görə, enerjiyə qənaət rejimində cihaz 150 saatdan çox fasiləsiz işləyə bilir.

Yeni model artıq Çində satışa çıxarılıb. Onun qiyməti 249 yuan (təxminən 59 manat) təşkil edir.