Bu gün böyük Azərbaycan tarixçisi Əliövsət Quliyevin anadan olmasından 100 il ötür.
Əliövsət Nəcəfqulu oğlu Quliyev 1922-ci il avqustun 23-də Salyan rayonunun Qızılağac kəndində anadan olmuşdur. Tarix elmləri doktoru, professor, Azərbaycan SSR EA-nın müxbir üzvü, 1953–1958-ci və 1967–1969-cu illərdə Azərbaycan SSR EA Tarix İnstitunun direktoru olmuşdur. Azərbaycan tarixini dərindən tədqiq etmiş və 3 cildlik “Azərbaycan tarixi” dərc etdirmişdir. Bu əsər tariximizə dair ilk kompleks tədqiqat hesab olunur. Əliövsət Quliyevin ümumi həcmi 300 çap vərəqindən çox olan dərc edilmiş əsərləri, o cümlədən monoqrafiyaları, dərslikləri və digər kitab nəşrləri vardır. 80-ə qədər elmi əsərin müəllifi olan tətqiqatçı əsasən Azərbaycan tarixinin problematik məsələlərini, xüsusən Azərbaycanda feodal münasibətlərinin meydana gəlməsini, Azərbaycan xalqının mənşəyini, Azərbaycanın XVI-XVIII əsrlər tarixini araşdırmışdır. Alim çoxcildlik “SSRİ tarixi” (I-VI cildlər, 1966-1968), “İnqilabdan əvvəlki Rusiyanın neft sənayesində inhisarçı kapital (1883-1914-cü illər)” (B., 1967), “Yeni inqilabi yüksəliş illərində Azərbaycanda fəhlə hərəkatı (1910-1914-cü illər)” kitablarının tərtibçilərindən biri və redaktoru olmuş, “Dünya xalqları seriyası”ndan “Qafqaz xalqları” (B., 1962) adlı cildin hazırlanaraq çap edilməsində müəllif və redaktor kimi yaxından iştirak etmişdir.
Ə.N.Quliyev Azərbaycan Ali Sovetinin Rəyasət Heyəti yanında Toponimiya komissiyasının ilk sədri olmuşdur. Alimin Azərbaycan xalqının tarixi ilə bağlı bir sıra məqalələri SSRİ ensiklopediyalarına daxil edilmiş, keçmiş Sovet İttifaqının müxtəlif respublikalarında, Hindistanda, Çexoslovakiyada və başqa ölkələrdə dərc olunmuşdur. Ə.N.Quliyev məqaləsi Moskvada çap olunaraq ikicildlik etnoqrafiya toplusuna daxil edilmiş ilk Azərbaycan tarixçisidir.
Böyük tarixçi alimlərin yetişdirilməsində misilsiz xidmətləri olan alim təəssüf ki, 1969-cu ildə, 47 yaşında kəskin leykoz xəstəliyindən vəfat etmişdir. Fəxri Xiyabanda dəfn edilmişdir.
Ruhu şad olsun!

https://az.wikipedia.org/wiki/%C6%8Fli%C3%B6vs%C9%99t_Quliyev