Hörmətli cənab Prezident.


Bu gün Siz hər bir Azərbaycan vətəndaşının böyük etimad göstərdiyi əsl Lider və bütün dünya üçün nümunəvi siyasi xadimsiniz.


Otuz il ərzində Ermənistanın işğalı altında qalmış torpaqlarımız Sizin müdrik siyasətiniz və komandanlığınız sayəsində öz azadlığına qovuşdu, xalqımızın Qarabağ həsrətinə son qoyuldu. Tariximizə qızıl hərflərlə yazılmış 44 günlük Vətən müharibəsi əzəli torpaqlarımıza göz dikmiş mənfur düşmənin acı məğlubiyyəti ilə nəticələndi. Siz “dəmir yumruğ”unuzla düşmənə heç vaxt unutmayacağı bir dərs verdiniz. Bir sözlə, rəhbər–xalq–ordu birliyi haqq-ədalət müharibəsində qazandığımız möhtəşəm Zəfərin təməli oldu.


Öz gücünə, iqtisadiyyatına arxalanan Azərbaycan dövləti Sizin rəhbərliyiniz və bilavasitə nəzarətinizlə işğaldan azad olunmuş ərazilərimizdə quruculuq işlərini əzmlə həyata keçirir. Əminik ki, bu işlər tezliklə və ən yüksək səviyyədə başa çatacaq, illərdir Vətən həsrəti, el-oba nisgili çəkən vətəndaşlarımız doğma yurd-yuvalarına qayıdacaqlar.


Əziz Prezidentimiz, Vətən müharibəsində canlarını qurban vermiş şəhidlərimizin ailələrinin və qazilərimizin sosial vəziyyətinin yaxşılaşdırılması, onların problemlərinin həlli üçün gördüyünüz işlər Sizin nə qədər humanist, qayğıkeş bir dövlət başçısı olduğunuzu sübut edir. Dünya azərbaycanlıları, xüsusilə də biz gənc nəsil Sizə güvənir, daxili və xarici siyasətinizi dəstəkləyirik.


Allah Sizi, ailənizi və xalqımızı qorusun!


Hörmətlə,


Qənbərzadə Əli Musa oğlu, Azərbaycan Mətbuat Şurasının üzvü, “Rezonans İnformasiya Portali” MMC-nin təsisçisi və direktoru.