Bakı və İrəvan yeni ilə qədər sülh sazişi imzalaya bilər, ancaq bir şərtlə ki, Ermənistan Azərbaycana qarşı ərazi iddialarından əl çəksin. Bu sözləri Şuşada keçirilən Qlobal Media Forumunun açılışında Azərbaycan Prezidenti İlham Əliyev deyib:
"Lakin bu baş verməsə, o zaman sülh də olmayacaq. Və bu, region üçün yaxşı ssenari deyil, sabitlik və təhlükəsizlik gətirməyəcək. Eyni zamanda, çox həssas geosiyasi vəziyyəti nəzərə alsaq, bu, gələcəkdə çətinliklər yaradacaq".
Dövlət başçısı xatırladıb ki, hazırda Azərbaycan tərəfindən Ermənistan-Azərbaycan münasibətlərinin normallaşması prosesi Rusiya, ABŞ və Aİ tərəfindən dəstəklənir. Bakı nəticəyönümlü yanaşmaya sadiq qalaraq üç istiqamətdə prosesdə səmimi iştirak edir. Lakin hələlik heç bir nəticə əldə olunmayıb:
"Hesab edirəm ki, Ermənistan son addımı atmalıdır. Onlar müharibədən sonra artıq bir sıra addımlar atıblar və mən deməzdim ki, bu addımlar könüllü atılıb. Son iki il yarım ərzində bir neçə məqam olub. Onlar Ermənistana açıq şəkildə nümayiş etdiriblər ki, bizim ərazi bütövlüyümüzü tanımazlarsa, biz də onların ərazi bütövlüyünü tanımayacağıq. Bu, artıq açıq şəkildə Azərbaycan üçün nə deməkdir. indi sənədin imzalanması mərhələsi başlayıb. Bu son dərəcə vacib son məqamdır”.