Moskvada Rusiya, Azərbaycan və Ermənistan xarici işlər nazirlərinin üçtərəfli görüşü başlayıb.
Danışıqları açan Rusiya naziri Sergey Lavrov qeyd edib ki, tərəflər bu görüşdən Cənubi Qafqazda vəziyyətin uzunmüddətli sabitləşməsi üçün istifadə etmək niyyətindədirlər.
"Əminik ki, buna ən qısa yol Rusiya, Azərbaycan və Ermənistan liderlərinin mövcud üçtərəfli bəyanatlarının bütün müddəalarının həyata keçirilməsidir. Liderlərimizin müzakirəsi üçün bir sıra əlavə sənədlər hazırlanır. Biz Bakı ilə İrəvan arasında sülh müqaviləsinin bağlanması ilə bağlı sazişlərin ən yüksək səviyyədə həyata keçirilməsinə xüsusi diqqət yetirmək istərdik. Biz buna hər cür köməklik göstərməyə hazırıq - Rusiya Federasiyası Xarici İşlər Nazirliyinin rəhbəri bildirib.

O, həmçinin əlavə edib ki, Qarabağla bağlı digər məsələlər daimi diqqətə layiqdir. "Mən hazırda beynəlxalq ictimaiyyətdə böyük diqqət və şərhlərə səbəb olan humanitar vəziyyəti nəzərdə tuturam. Biz azərbaycanlı dostlarımızın Qarabağın erməni əhalisinin hüquq və təhlükəsizliyinin təmin edilməsinin zəruriliyini başa düşmələrini yüksək qiymətləndiririk. Bu, mərkəzi məsələlərdən biridir".