Burda 25 il də saxlaya bilərlər”

Yunanıstan həbsxanasında saxlanılan iki azərbaycanlı soydaşımız Azərbaycan mediasına müraciət edib.

Onlardan biri vatsap vasitəsilə səsli mesaj yollayaraq ölkə jurnalistlərindən yardım istəyib. Yunanıstan həbsxanasında olan şəxslər Neftçala rayonunun Bankə qəsəbəsi sakini Ağayev Rauf Tofiq oğlu və Salyan rayonunun Qızılağac kəndindən Mikayılov Əbülfəz Adışirin oğludur. Onlar Türkiyəyə işləməyə gediblər. Qardaş ölkədə olarkən onlara İtaliyada işləmək təklif edilib və hətta yüksək məvacib vəd edilib. Gəmi ilə gizli formada İtaliyaya keçmək istəyən soydaşlarımız Yunanıstanda tutulublar və 3 aydı sözügedən ölkədə həbsdədirlər.

Vatsap üzərindən göndərilən səsdə (məhbuslara yaxınları və ailə üzvləri ilə telefon əlaqəsi qurmağa icazə verilir – musavat.com) həbs olunan soydaşımız həbs hekayəsini danışaraq yardım istəyib. O, həbsxanada 25 il qala biləcəyini də istisna etməyib. O, daha sonra aşağıdakıları bildirib: “Qanunu pozmuşuq, bunu bilirik. Amma vəkil belə, tuta bilmirik. Bizə kimsə nəsə demir, hansı aqibətlə qarşılaşacağımızı bilmirik”.

Tutulanlardan birinin xanımı isə söyləyib ki, səfirliyə müraciət etsələr də, hər hansı cavab ala bilmirlər.

Musavat.com həbsdə saxlanılan soydaşımızın səs yazısını təqdim edir və əlaqədar qurumları onların taleyinə biganə qalmamağa çağırır.