Pakistanın Pəncab əyalətinin baş naziri Məryəm Nəvaz Şərifin yaşıl təşəbbüsü çərçivəsində, Ravi Şəhər İnkişafı İdarəsinin (RUDA) həyata keçirdiyi ölkənin ilk Karbon Bazarı Pilot Layihəsinin açılışı baş tutub.

Pakistanın Pəncab əyalətinin baş nazirinin baş müşaviri və əyalətin baş naziri vəzifəsini icra edən Marriyum Aurangzeb RUDA-nın nəzdində fəaliyyət göstərən Mehmud Buti poliqonunda quraşdırılmış metan qazının yandırılması sisteminin açılışını edib.

Lahorda yerləşən Mehmud Buti tullantı sahəsinin günəş enerjisi parkına və şəhər meşəçiliyi zonasına çevrilməsi sürətlə davam edir. Layihənin birinci mərhələsi artıq tamamlanıb, ikinci mərhələnin isə ilin sonunadək başa çatdırılması nəzərdə tutulur.

RUDA rəsmiləri bildiriblər ki, poliqondan ayrılan metan qazı investisiyalar hesabına enerji mənbəyinə çevriləcək və layihə karbon kreditlərinin əldə olunmasına imkan verəcək. Lahor Dairəvi Yolunun şimalında yerləşən Mehmud Buti tullantı sahəsi uzun illər ətraf mühitin çirklənməsinə və sakinlərin sağlamlığı üçün risklərə səbəb olub.

Vaxtilə təxminən 80 fut hündürlüyündə tullantı yığını ilə örtülmüş 43 akrlıq ərazi hazırda torpaq və yaşıllıqla bərpa olunur, günəş enerjisi parkı və şəhər meşəsinə çevrilir.

RUDA 2023-cü ildə Mehmud Butinin günəş enerjisi parkı və istirahət məkanına çevrilməsi ilə bağlı texniki-iqtisadi əsaslandırma işlərinə başlayıb. Hazırkı əyalət rəhbərliyi bu təşəbbüsü Baş nazir Məryəm Nəvaz Şərifin "Təmiz Pəncab" proqramına daxil edib.

RUDA-nın baş icraçı direktoru İmran Amin bildirib ki, poliqondan çıxarılan qaz karbon kreditləri vasitəsilə satışa çıxarılacaq. Bu məqsədlə ərazinin müxtəlif hissələrində diametri təxminən 30 santimetr olan iri plastik borular quraşdırılıb və onlar metan qazının toplanmasına xidmət edir.

İmran Amin əlavə edib ki, qaz hasilatı ilə yanaşı, ərazidə 11 akrlıq günəş enerjisi parkı da yaradılır. Parkın təxminən 5 meqavat elektrik enerjisi istehsal etməsi gözlənilir. Ətrafdakı 31 akrlıq sahədə isə ağacəkmə kampaniyaları, piyada yolları və şəhər meşəçiliyi layihələri həyata keçiriləcək.

Marriyum Aurangzeb RUDA-nın fəaliyyətini yüksək qiymətləndirərək vurğulayıb ki, Mehmud Butinin transformasiyası keçmiş tullantı sahəsini gəlir gətirən iqtisadi aktivə çevirib.

Onun sözlərinə görə, layihə karbon kreditləri, bioqaz və elektrik enerjisi istehsalı hesabına iqtisadi fayda verəcək. Rəsmilər hesab edirlər ki, təkcə karbon kreditlərinin satışı əhəmiyyətli illik gəlir gətirəcək, günəş parkında istehsal olunacaq elektrik enerjisi isə kommersiya baxımından rentabelli olacaq. Karbon kreditləri proqramı üzrə texniki-iqtisadi əsaslandırma artıq tamamlanıb.

Nazir sonda RUDA-nın ərazini ekoloji cəhətdən təhlükəsiz və faydalı məkana çevirmək istiqamətində gördüyü işləri xüsusi qeyd edib.