GL Group Şimali Amerikadakı fəaliyyətini Texasda neft və qaz aktivlərinin alınması ilə genişləndirir

ABŞ–Azərbaycan Ticarət Palatasının (USACC) üzvü olan GL Group Texas ştatının Midland şəhəri yaxınlığında yerləşən dörd hasilat yatağında neft və qaz aktivlərini satın aldığını elan edib. Sövdələşmə 200-dən çox aktiv hasilat quyusunu əhatə edir və GL Group bu aktivlərin operatorluğunu tam şəkildə öz üzərinə götürür.

Bu satınalma Azərbaycanın özəl sektoru üçün tarixi əhəmiyyət daşıyır. Bununla da GL Group ABŞ-da hasilatda olan neft və qaz aktivlərinə sahib olan və onları idarə edən ilk Azərbaycan şirkəti olur. İnvestisiya Azərbaycanın özəl sektorunun ABŞ enerji sənayesində iştirakının genişlənməsinə, eyni zamanda iki ölkə arasında ticari əlaqələrin daha da möhkəmlənməsinə mühüm töhfə verir.

Yeni əldə olunan aktivlər ABŞ-ın ən böyük neft hasilatı bölgəsi və dünyanın ən məhsuldar quru karbohidrogen hövzələrindən biri olan Perm hövzəsində (Permian Basin) yerləşir. Qərbi Texas və Nyu-Meksiko ştatının cənub-şərq hissəsini əhatə edən hövzənin sahəsi təxminən 86 min kvadrat mil (223 min kvadrat kilometr) təşkil edir.

2025-ci ildə Perm hövzəsində gündəlik təxminən 6,6 milyon barrel xam neft hasil olunub ki, bu da ABŞ-ın ümumi neft hasilatının təxminən yarısına və dünya üzrə ümumi neft hasilatının 8 faizindən çoxuna bərabərdir. Eyni zamanda burada gündəlik təxminən 27,6 milyard kub fut kommersiya məqsədli təbii qaz hasil edilib ki, bu da ABŞ-ın ümumi qaz hasilatının təxminən 23 faizini və dünya üzrə qaz hasilatının təxminən 7 faizini təşkil edir.

Bu satınalma GL Group-un 2024-cü ildə Türkiyənin neft və qaz sektoruna daxil olmasından sonra beynəlxalq inkişaf strategiyasında növbəti mühüm mərhələ hesab olunur. İnvestisiya şirkətin ABŞ bazarında uzunmüddətli inkişafı üçün möhkəm əməliyyat platforması yaradır və onun beynəlxalq upstream enerji şirkətinə çevrilmək məqsədini daha da gücləndirir.
GL Group-un Baş icraçı direktoru və Məşvərət Şurasının sədri Asif Zeynalov bildirib:

"Bu, GL Group komandası üçün qürurverici bir gündür. Bu satınalma dünyanın ən böyük və ən rəqabətli neft-qaz bazarında fəaliyyətimizi təmin edən strateji mərhələdir. O, beynəlxalq upstream biznesi qurmaq üzrə uzunmüddətli baxışımızı əks etdirir və ABŞ-da davamlı inkişaf üçün güclü platforma yaradır."

GL Group haqqında

GL Group Azərbaycanda neft və qaz hasilatı ilə məşğul olan və beynəlxalq enerji layihələrinə investisiya yatıran şaxələndirilmiş enerji şirkətidir.

Şirkət Azərbaycanda beş neft və qaz yatağını istismar edir. Bunlara Salyan rayonundakı Kürsəngi və Qarabağlı yataqları, həmçinin Abşeron yarımadasında yerləşən Buzovna-Maştağa, Qala və Zirə yataqları daxildir.

GL Group-un portfelinə Salyan Oil Limited, Tağıyev Operating Company və neft-qaz sənayesinə ixtisaslaşmış texniki xidmətlər göstərən GL Technical Services LLC daxildir.
2024-cü ildə şirkət ilk beynəlxalq investisiyasını həyata keçirərək Canadian Gazelle Energy Limited şirkətinin Türkiyənin Trakya hövzəsində yerləşən perspektivli təbii qaz lisenziyasında 25 faiz pay əldə edib.

Perm hövzəsində hasilat aktivlərinin alınması GL Group-un beynəlxalq inkişaf strategiyasını daha da irəli aparır və şirkətin regionun yüksələn enerji investorlarından biri kimi mövqeyini gücləndirir.