Azərbaycan və Türkmənistan Xəzər dənizində yükdaşımalar sahəsində əməkdaşlığın inkişaf etdirilməsi məqsədilə birgə praktiki təlim keçirib.

Türkmənistan Dövlət Gömrük Xidmətinin məlumatına görə, təlim Bakı Beynəlxalq Dəniz Ticarət Limanı və Türkmənbaşı beynəlxalq dəniz limanlarının nümayəndələrinin iştirakı ilə təşkil olunub. Tədbirdə, həmçinin Qazaxıstan və Tacikistanın nümayəndələri iştirak ediblər.

Təlim çərçivəsində Xəzər dənizində beynəlxalq yük dövriyyəsinin inkişafı, malların qanunsuz dövriyyəsinə qarşı mübarizə və bununla bağlı risklərin azaldılması məsələləri müzakirə olunub.

İştirakçılar praktiki təcrübə mübadiləsi aparıb, əmtəə və yük müşayiətedici sənədlərlə birgə işləyiblər. Tədbirin əsas məqsədlərindən biri mütəxəssislərin peşəkar bacarıqlarının, operativ informasiya mübadiləsinin və limanlar arasında birbaşa əməkdaşlığın təkmilləşdirilməsi olub.

Məlumata görə, növbəti mərhələdə yüklərin və nəqliyyat vasitələrinin gömrük yoxlanışına dair birgə mexanizmin hazırlanması planlaşdırılır.