AzadMedia
Telegram Facebook Twitter Youtube Instagram

Səfərovun gediş sirri: azərbaycanlı və erməni icmaların dialoqu başlanır - Gəlişmə...

  • + A
  • - A
  • 7-01-2019, 10:30

    Səfərovun gediş sirri: azərbaycanlı və erməni icmaların dialoqu başlanır - Gəlişmə...














    Bayram Səfərovun Dağlıq Qarabağın Azərbaycanlı İcmasının sədri postundan getməsinin əsl səbəbləri aydınlaşır. Tural Gəncəliyev amilinin detalları bilinir.

    Cahan.info xəbər verir ki, bu dəyişiklik fərdi məsələ deyilmiş. Qarabağ danışıqlarında yaranmış yeni əlverişli imkanları dəyərləndirmək üçün icmanın fəaliyyəti aktivləşir.

    Hökumət praqmatik, gənc, rus və ingilis dilləri bilən icma sədri seçilməsini tələb edirdi. B.Səfərov isə danışıqlar masası üçün uğurlu kadr hesab edilmirdi.

    “Atlas” Araşdırmalar Mərkəzinin rəhbəri Elxan Şahinoğlunun fikrincə, Dağlıq Qarabağın Azərbaycanlı İcmasının sədri postunda artıq çevik, gənc, perspektivli, enerjili şəxsə ehtiyac vardı.

    Çünki Dağlıq Qarabağın Azərbaycanlı İcmasının sədri 3 istiqamətdə -həm Dağlıq Qarabağın erməni icması, separatçılar, həm Ermənistan hakimiyyəti, həm də xaricdəki erməni lobbisi ilə mübarizə aparmalıdır.

    İcmanın rəhbəri xarici ölkələrdə görüşlərdə iştirak etməli, ən azı rus və ingilis dillərini bilməlidir. Şuşada anadan olmuş bir şəxsin Dağlıq Qarabağın Azərbaycanlı İcmasına yeni sədr seçməklə doğru qərar verilib.

    Mümkündür ki, gələcəkdə Dağlıq Qarabağın azərbaycanlı və erməni icmaları arasında dialoq başlasın. Böyük ehtimalla, gələn il üçüncü ölkələrdə belə dialoqun keçirilməsi mümkündür.

    Son aylarda Dağlıq Qarabağ separatçılarının lideri müxtəlif ölkələrə -Fransaya, Rusiyaya, ABŞ-a səfərlər edib. Bu, bizim narazılığımıza səbəb oldu və Xarici İşlər Nazirliyi bir neçə nota verdi.

    Ona görə Dağlıq Qarabağın azərbaycanlı icmasının sədri çevik bir şəxs olmalıdır ki, o da bu səfərlərə çıxsın və Azərbaycan tərəfinin mövqeyini dünya ölkələrinə çatdırsın.

    Dağlıq Qarabağdakı hər iki icmanın danışıqlar prosesində maraqlı tərəf kimi iştirakı ATƏT-in 1992-ci il Helsinki qərarında təsbit olunub. Burada söhbət birbaşa tərəf kimi iştirakdan getmir.

    Cahan.info-nun mediaya istinadən məlumatına görə, Dağlıq Qarabağ Bölgəsinin Azərbaycanlı İcmasının yeni sədri Tural Gəncəliyev dünən yeni rəhbər qismində ilk tvitini atıb. İngilis dilində yazılan tvitdə bu sözlər qeyd olunub:

    ” I’m IDP since 1992. Enough is Enough. I would like to exercise my inseparable right to return my native Shusha and to our house where I spent my childhood. #OSCEMG Co-Chairs”

    – “Mən 1992-ci ildən məcburi köçkünəm. Yetercə kifayətdir. Mən doğma Şuşaya və uşaqlığımın keçdiyi evimizə qayıtmağımın ayrılmaz hüququnu həyata keçirmək istərdim. # ATƏTMQ həmsədrləri”. Tvitlə yanaşı yerləşdirilən iki fotoda işğaldan öncəki Şuşa şəhəri əks olunub.

    T. Gəncəliyev bu günlərdə Xarici İşlər Nazirliyinin Beynəlxalq Hüquq və Müqavilələr İdarəsinin birinci katibi vəzifəsinə təyin edilib və rəsmi olaraq birinci katib kimi vəzifəsinin icrasına hələ də başlamayıb.

    Xarici işlər naziri Elmar Məmmədyarovun imzaladığı əmrə əsasən, T. Gəncəliyev birinci katib kimi vəzifəsinin icrasına gələn il yanvarın 7-dən başlayacaq.

    Bu fakt göstərir ki, T. Gəncəliyevin “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin sədri vəzifəsinə gətirilməsinin həm onun özü, həm də E. Məmmədyarov üçün gözlənilməz olub.

    Ombudsman Aparatında çalışmış T. Gəncəliyev daha sonra Azərbaycanın Kanada və Çexiyadakı diplomatik nümayəndəliklərində müxtəlif vəzifələrdə işləyib.

    Birinci katib təyin olunduğu Beynəlxalq Hüquq və Müqavilələr İdarəsi isə xarici işlər nazirinin sabiq müavini Xələf Xələfovun birbaşa tabeçiliyində olub.

    T. Gəncəliyevin Beynəlxalq Hüquq və Müqavilələr İdarəsinin birinci katibi vəzifəsinə təyinatdan imtina edib-etməyəcəyi də hələ dəqiqləşməyib.

    Qanunvericilikdə diplomatın həm də bir İctimai Birliyin, daha doğrusu QHT-nin rəhbəri olub-olamaması barədə konkret müddəa yoxdur.

    Lakin bununla belə, XİN-nin idarələrinin birində birinci katib postunu tutan şəxsin İcma rəhbəri kimi təqdimatı da suallar yarada bilər. Ona görə də bu barədə məsələ hazırda hökumətdə müzakirə olunur və yekun qərar qəbul edilməyib.

    Qeyd edək ki, indiyə qədər "Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin ofisi Şuşa rayon İcra Hakimiyyətinin binasında yerləşib. Bu da təbiidir.

    Çünki "Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin sədrləri indiyə qədər məhz Şuşa rayon İcra Hakimiyyətinin başçıları olub.

    Ancaq indi fərqli durum yaranıb. Şuşa rayon İcra Hakimiyyətində də "Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin həmin binada fəaliyyətini davam etdirəcəyi, yaxud ayrıca bir ofisdə fəaliyyət göstərəcəyi barədə dəqiq məlumat yoxdur.


    www.AzadMedia.az

    Mətndə səhv var? Onu siçanla seçin və Ctrl+Enter düyməsini basın.
    OXŞAR XƏBƏRLƏR

    Köşə
    XƏBƏR LENTİ
    BÜTÜN XƏBƏRLƏR