Məşhur Məmmədov,
Milli Məclisin deputatı

Hər il iyunun 1-i bütün dünyada Beynəlxalq Uşaqların Müdafiəsi Günü kimi qeyd olunur. Bu əlamətdar gün uşaqların hüquqlarının qorunması, onların sağlam, təhlükəsiz və firavan mühitdə böyüməsinin təmin edilməsi istiqamətində görülən işlərin bir daha diqqət mərkəzinə gətirilməsi baxımından xüsusi əhəmiyyət daşıyır.

Azərbaycan dövləti hər zaman uşaqları cəmiyyətin ən həssas və ən qiymətli təbəqəsi hesab edib. Ümummilli Lider Heydər Əliyev tərəfindən əsası qoyulan dövlət uşaq siyasəti ölkəmizdə gənc nəslin hərtərəfli inkişafına xidmət edən mühüm prinsiplər üzərində qurulub. Ulu Öndər dəfələrlə vurğulayırdı ki, uşaqlar Azərbaycanın gələcəyidir və onların sağlam, savadlı, vətənpərvər ruhda böyüməsi dövlətin ən vacib vəzifələrindən biridir. Məhz onun rəhbərliyi dövründə uşaqların sosial müdafiəsinin gücləndirilməsi, təhsil və səhiyyə xidmətlərinin inkişaf etdirilməsi istiqamətində mühüm addımlar atılmış, gələcək nəsillərin rifahını hədəfləyən uzunmüddətli dövlət strategiyasının təməli qoyulmuşdur.

Bu siyasi xətt bu gün Azərbaycan Respublikasının Prezidenti İlham Əliyev tərəfindən uğurla davam etdirilir. Son illər ölkəmizdə yeni məktəblərin tikilməsi, mövcud təhsil müəssisələrinin əsaslı təmiri, müasir tədris avadanlıqları ilə təmin olunması, uşaqların sağlamlığının qorunmasına yönəlmiş layihələrin həyata keçirilməsi dövlətin bu sahəyə xüsusi diqqətinin göstəricisidir. Eyni zamanda, aztəminatlı ailələrdən olan uşaqların təhsil imkanlarının genişləndirilməsi, xüsusi qayğıya ehtiyacı olan uşaqların cəmiyyətə inteqrasiyası və onların hüquqlarının müdafiəsi istiqamətində mühüm proqramlar reallaşdırılır. Prezident İlham Əliyevin rəhbərliyi ilə həyata keçirilən sosial siyasətin əsas istiqamətlərindən biri də uşaqların hərtərəfli inkişafı üçün bərabər imkanların yaradılmasıdır.

Azərbaycanın Birinci vitse-prezidenti Mehriban Əliyeva tərəfindən həyata keçirilən humanitar təşəbbüslər də uşaqların rifahının yüksəldilməsinə böyük töhfə verir. Heydər Əliyev Fondu vasitəsilə həyata keçirilən layihələr çərçivəsində yüzlərlə məktəb və uşaq müəssisəsi inşa olunub, xüsusi qayğıya ehtiyacı olan uşaqlara dəstək göstərilib, onların təhsil və müalicə imkanlarının yaxşılaşdırılması istiqamətində mühüm işlər görülüb. Fondun həyata keçirdiyi proqramlar yalnız paytaxtı deyil, regionları da əhatə edərək minlərlə uşağın həyatında müsbət dəyişikliklər yaradıb.

Bu gün işğaldan azad olunmuş ərazilərdə aparılan bərpa-quruculuq işləri çərçivəsində uşaqlar üçün müasir məktəblər, bağçalar, idman və mədəniyyət mərkəzləri yaradılır. Qarabağa qayıdan ailələrin övladlarının ən müasir şəraitdə təhsil alması və inkişaf etməsi üçün dövlət tərəfindən bütün zəruri addımlar atılır. Bu, Azərbaycanın gələcəyinə yönəlmiş ən mühüm investisiyalardan biridir.

Beynəlxalq Uşaqların Müdafiəsi Günü münasibətilə bütün uşaqları səmimi qəlbdən təbrik edir, onlara sağlam, firavan və xoşbəxt həyat arzulayıram. Arzu edirəm ki, hər bir uşaq sevgi, qayğı və diqqət içərisində böyüsün, öz istedadını və potensialını reallaşdırmaq üçün geniş imkanlar əldə etsin. Çünki uşaqların xoşbəxtliyi və uğuru ölkəmizin sabahkı inkişafının, güclü dövlətimizin və sağlam cəmiyyətimizin ən mühüm təminatıdır.

[center]