Ağ Evin sözçüsü Karolin Levitt bildirib ki, ABŞ ilə İran arasında davam edən danışıqlar “məhsuldar olaraq qalır”.

Onun sözlərinə görə, ABŞ prezidenti tərəfindən daha əvvəl də qeyd edildiyi kimi, danışıqlar müsbət istiqamətdə davam edir:
“Prezidentin bazar ertəsi dediyi kimi, onlar məhsuldardır və belə də qalır.”

Levitt mediada yayılan məlumatlara da münasibət bildirib. O qeyd edib ki, ABŞ-ın İrana təqdim etdiyi iddia olunan 15 maddəlik planla bağlı xəbərlərdə müəyyən həqiqət payı olsa da, bəzi məqamlar reallığı tam əks etdirmir.

Sözçü jurnalistləri anonim mənbələrə əsaslanan spekulyativ məlumatlardan çəkinməyə çağırıb.

Bununla yanaşı, Ağ Ev nümayəndəsi vurğulayıb ki, Vaşinqton İranla aparılan danışıqların detalları barədə məlumat açıqlamaq niyyətində deyil.