İsraildə keçiriləcək parlament seçkiləri ərəfəsində aparılan yeni rəy sorğusunda müxalifət partiyaları Baş nazir Binyamin Netanyahunun rəhbərlik etdiyi blokdan üstün olub.

“Zman Yisrael” saytının sifarişi ilə keçirilən sorğunun nəticələrinə əsasən, seçkilər bu gün keçirilsəydi, Netanyahunu dəstəkləyən partiyalar Knessetdə 120 yerdən 47-ni əldə edərdi. Bu, hökumət formalaşdırmaq üçün tələb olunan 61 mandatdan 14 yer azdır.

Netanyahunun əleyhinə çıxış edən dörd əsas yəhudi partiyası isə ümumilikdə 55 mandat qazana bilər. Bu göstərici parlament çoxluğu üçün tələb olunan saydan 6 mandat azdır.
Netanyahuya qarşı mövqe sərgiləyən ərəb partiyaları — Raam və Birləşmiş Siyahı — daha 14 mandat əldə edə bilər. Lakin bu partiyalar adətən hökumət koalisiyasının mümkün iştirakçıları kimi nəzərdən keçirilmir.

Ofer Vinterin rəhbərlik etdiyi “İsrail Xalqı” partiyası 4 mandat qazanır. Partiya Netanyahunu tənqid etsə də, Vinter hazırkı baş nazirin rəhbərlik etdiyi koalisiyaya qoşulmağa hazır olduğunu bildirib. Bu partiya Netanyahu blokuna daxil edilərsə, blokun mandatlarının sayı 51-ə çatır. Ərəb partiyaları da müxalifət blokuna əlavə edildikdə isə müxalifətin göstəricisi 69 mandata yüksəlir.

Sorğunun lideri Qadi Eyzenkotun rəhbərlik etdiyi müxalifətçi “Yaşar” partiyasıdır. Partiyanın 24 mandat qazanacağı proqnozlaşdırılır. Netanyahunun “Likud” partiyası isə 20 mandatla ikinci yerdədir.

Növbəti yerlərdə 13 mandatla müxalifətçi “Beyahad”, 10 mandatla onun müttəfiqi “Bizim Evimiz İsrail” qərarlaşıb. Birləşmiş Siyahının 9 mandat qazanacağı gözlənilir.
“Şas”, “Vahid Tövrat Yəhudiliyi” və solçu “Demokratlar” partiyalarının hər birinin 8 mandat əldə edəcəyi proqnozlaşdırılır. Ultra-sağçı “Otsma Yehudit” 6, ərəb “Raam” və “Dini Sionizm – Zehut” alyansı isə hərəyə 5 mandat qazana bilər.
Ofer Vinterin “İsrail Xalqı” partiyası isə seçki baryerini keçmək üçün tələb olunan minimum 4 mandatı əldə edir.
İki siyasi qüvvə — Yoaz Hendelin və Yaron Zelehanın hərəkatları, eləcə də Beni Qantsın “Mavi və Ağlar” partiyası seçki baryerini keçə bilmir.

Sorğu 7-8 oktyabr tarixlərində “Tatika Research & Media” şirkəti tərəfindən “Adgenda” paneli ilə birgə keçirilib. Araşdırmada 500 nəfər iştirak edib, statistik xəta payı isə 4,4 faiz bəndi təşkil edir.
İsraildə Knesset seçkilərinin 27 oktyabrda keçirilməsi planlaşdırılır.