Şəfa gəldin ömrümə, ruhum, eynim açıldı,
Qönçələndi bağımın gülləri gəlişindən.
Bədirləndi ilhamım , havalandı ürəyim,
Unutdum hədər ötən illəri gəlişindən.
•
Mərhəba sözü duzlum, dili ballım mərhəba!
Nəfsi-Zəhram, həyalım, başı şallım mərhəba !
İsməti məlayikəm , xub ifallım mərhəba !
Yenə daşdı təbimin selləri gəlişindən.
•
Gözlərimin içindən qəlbimi görən gözəl,
Sevincini gizlədib , dərdimi dərən gözəl,
Gül üzlüm, bəstə boylum , saçları kürən gözəl,
Avazlandı könlümün telləri gəlişindən.
•
Cabirəm xalı sərim, çirmələnim önündə,
Sarınım saf eşqinə , bürmələnim önündə,
Dönük çıxsam canımdan cərmələnim önündə,
Açıldı lal aşiqin dilləri gəlişindən .

Cabir Qurbanov