Əfqanıstandakı Taliban rəsmilərinin cümə axşamı bildirdiyinə görə, vilayət qubernatorunun ofisində baş verən partlayış qubernatorun və daha iki nəfərin ölümünə səbəb olub.

Yerli xəstəxana rəsmiləri Bəlx vilayətinin şimalındakı Məzari-Şərif səhərində səhər tezdən baş verən hücum zamanı azı 7 nəfərin yaralandığını bildirib.

Vilayət polis rəsmisinin dediyinə görə, üzərində partlayıçı qurğulu gödəkçə geyinmiş intiharçı özünü binanın qubernator Məhəmməd Davud Muzamilin ofisinin yerləşdiyi ikinci mərtəbəsində partladıb.

Partlayışın məsuliyyətini üzərinə götürən olmayıb.

Talibanın baş sözçüsü Zabihulla Mücahid Twitter hesabında Muzamilin ölümünü təsdiqləyərək, onun "İslam düşmənləri tərəfindən öldürülərək şəhid olduğunu" bildirib. Mücahid puştu dilində yazdığı tvitində hadisə ilə bağlı araşdırma aparıldığını bildirib.

Muzamil 2021-ci ildə ABŞ və NATO qoşunlarının ölkəni tərk etməsindən və radikal qrupun Əfqanıstanda nəzarəti bərpa etməsindən sonra öldürülən ikinci yüksək səviyyəli Taliban lideridir.