Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyində akkreditasiya edilmiş inspeksiya orqanlarının nümayəndələri ilə Keyfiyyət informasiya sistemindən – E-keyfiyyet.gov.az platformasından istifadəyə dair növbəti maarifləndirici görüş keçirilib.

Dövlət Agentliyindən bildirilib ki, tədbirdə inspeksiya fəaliyyəti həyata keçirən 16 qurumun 25-ə yaxın nümayəndəsi iştirak edib.

Görüşdə bildirilib ki, qanunvericiliyə edilmiş dəyişikliklərə əsasən, akkreditasiya olunmuş uyğunluğu qiymətləndirən qurumların fəaliyyəti, o cümlədən inspeksiya orqanlarının apardığı yoxlamaların nəticələrinin rəsmiləşdirilməsi Keyfiyyət informasiya sistemi vasitəsilə həyata keçirilməlidir.

Tədbirdə sistem vasitəsilə yaradılan və rəsmiləşdirilən sənədlərə dair statistik məlumatlar təqdim olunub. İnspeksiya orqanlarının “Asan İmza” və ya elektron imzadan istifadə etməklə inspeksiya rəylərini elektron formada hazırlaması, sənədlərin QR kod vasitəsilə eyniləşdirilməsi və onların elektron qaydada tanınması sistemin əsas üstünlüklərindən biri kimi diqqətə çatdırılıb.

Bu yenilik, ilk növbədə, sənədlərin saxtalaşdırılması riskinin azaldılması, yoxlamaların nəticələrinin şəffaflaşdırılması və istehlakçıların təqdim olunan sənədlərə etimadının artırılması baxımından əhəmiyyətlidir. Eyni zamanda, elektron sistem inspeksiya orqanlarının qanunvericiliyin və akkreditasiya tələblərinin tələblərinə uyğun fəaliyyət göstərməsinə nəzarəti gücləndirə bilər.

Lakin burada cəmiyyət üçün maraqlı olan əsas məsələ elektron sistemin yaradılmasından daha çox, onun real həyatda istehlakçının hüquqlarını nə dərəcədə qoruyacağıdır.

İstehlakçı QR kod vasitəsilə inspeksiya rəyinin həqiqiliyini özü yoxlaya biləcəkmi?

Digər mühüm sual isə budur: Elektron sistemə keçid yoxlamaların nəticələrinin ictimaiyyət üçün daha şəffaf olmasına və pozuntuların qarşısının vaxtında alınmasına nə dərəcədə imkan verəcək?

Elektronlaşmanın yalnız sənədləşmə prosesini sürətləndirməsi deyil, həm də istehlakçıların hüquqlarının qorunmasına, saxtalaşdırılmış sənədlərin qarşısının alınmasına və nəzarət mexanizmlərinin gücləndirilməsinə xidmət etməsi gözlənilir.

Görüşün sonunda inspeksiya orqanlarının nümayəndələrinin təklifləri dinlənilib, onları maraqlandıran suallar cavablandırılıb.