Nazim Eynallı
19 saylı Şamaxı Xüsusi Təyinatlı Yol İstismarı MMC-nin rəisi

Azərbaycan uzun illər boyu Ermənistanın işğalçı və saxtakarlıq siyasəti ilə üz-üzə qaldı. Rəsmi İrəvanın məqsədyönlü şəkildə həyata keçirdiyi düşmənçilik siyasəti regionda sülh və sabitliyi pozdu, Azərbaycan xalqının tarixi torpaqlarında ədalətsiz işğal siyasətinə zəmin yaratdı. Qarabağa ermənilərin çar Rusiyası dövründə köçürülməsindən sonra azərbaycanlıların toponimləri dəyişdirildi, kəndlər və şəhərlər ələ keçirildi, xalqımız öz doğma yurd-yuvasında sıxışdırıldı. Bu proses əsrlərlə davam etdi və nəticədə XX əsrin sonlarında açıq müharibəyə çevrildi.

2020-ci ildə Azərbaycan Ordusu Ali Baş Komandan İlham Əliyevin rəhbərliyi ilə bu tarixi ədalətsizliyə son qoydu. 44 gün davam edən Vətən müharibəsi nəticəsində işğal altındakı torpaqlarımız azad edildi. Qəhrəman oğullarımız canları, qanları bahasına Azərbaycanın ərazi bütövlüyünü bərpa etdilər və tarixi ədaləti təmin etdilər.

Anım Günü bütün şəhidlərin ruhuna ehtiram olaraq qeyd olunur. Bu gün hər bir azərbaycanlı üçün həm kədər, həm də qürur mənbəyidir. Kədər ona görə ki, Vətən uğrunda gənc ömrünü fəda edən igidlərimizi itirdik. Qürur isə ona görə ki, onların şücaəti və fədakarlığı sayəsində Azərbaycan qalib xalq statusunu qazandı, dövlətimiz gücünü dünyaya sübut etdi.

Bu günün mesajı ondan ibarətdir ki, Azərbaycan xalqı heç vaxt işğal və ədalətsizliklə barışmayıb və bundan sonra da barışmayacaq. Şəhidlərin xatirəsi daim uca tutulacaq, onların qəhrəmanlığı gələcək nəsillərə örnək olacaq.

Anım Günü bir daha bizə göstərir ki, milli birliyin, vətənpərvərliyin və həmrəyliyin gücü ilə hər bir çətinlik dəf oluna bilər. Azərbaycan xalqı öz şəhidlərinin xatirəsini daim ehtiramla yad edəcək və onların qoyduğu müqəddəs mirası qoruyacaq.