Jurnalist Nailə Balayeva “Facebook” hesabında paylaştığı statusda “İsti İsti Kulinariya” şəbəkəsinin müştərilərə qarşı tətbiq etdiyi qeyri-adi və qanunsuz qiymət siyasətini kəskin tənqid edib. Onun yazdığına görə, müəssisədə 100 qramlıq salatı müştəriyə satmaqdan imtina edilir və minimum 3 manatlıq alış məcburi qayda kimi tətbiq olunur. Bu, həm istehlakçı hüquqlarının kobud şəkildə pozulması, həm də antiinhisar qaydalarına zidd davranışdır.

Nailə Balayeva qeyd edir ki, satıcılar salatların qiymətini “ortalama 18 manat” elan etsələr də, müştəriyə cəmi 1 manat 80 qəpiklik – yəni 100 qramlıq porsiya belə satılmır. Jurnalist haqlı olaraq sual edir: “Niyə insanları ‘quşaqdan aşağı’ məsələlər üzrə linç edirsiniz? Bax belə davranışları biabır etmək lazımdır – kasıba salat satmırlar!”

Onun fikrincə, dünyanın heç bir ölkəsində, eləcə də Bakıda qida mağazalarında məhsulun müştərinin istədiyi qədər alınmasına qadağa qoyulmur. Bu məhdudiyyət həm hüquqi baxımdan yolverilməzdir, həm də sosial ədalət prinsiplərini tapdalayır. Müştərinin büdcəsinə uyğun alış edə bilməməsi açıq şəkildə diskriminasiya kimi qiymətləndirilə bilər.

Nailə Balayeva haqlı olaraq Antiinhisar və İstehlak Bazarına Nəzarət Dövlət Agentliyinə müraciət edir: “Bu istehlakçının istədiyi qədər məhsul almaq hüququnun kobud pozulmasıdır. Hara baxırsınız? Niyə məşğul olmursunuz?”

Həqiqətən də, istehlakçı hüquqlarına dair qanunvericiliyə əsasən, vətəndaşın məhsulu istədiyi miqdarda almaq hüququ var. Satıcının minimum məbləğ tələbi qoyması bazar prinsiplərinə ziddir və süni məhdudiyyət hesab olunur.

“İsti İsti Kulinariya”da tətbiq edilən bu qayda yalnız bir müştərinin narazılığı deyil, daha geniş sosial problemə – vətəndaşın elementar hüquqlarının tapdanmasına işarədir. Jurnalist Nailə Balayevanın statusu cəmiyyətdə geniş rezonans yaradıb və aidiyyəti qurumların bu iddialara reaksiya verməsi artıq zərurətə çevrilib.

İstehlakçıların hüquqları mühafizə olunmadıqca, belə hallar təkcə mətbəxdə deyil, həm də münasibətlərdə “dad pozulmasına” gətirib çıxaracaq. Aidiyyəti qurumların məsələyə dərhal müdaxilə etməsi isə ictimai etimadı bərpa etməyin yeganə yoludur.