ABŞ Maliyyə Nazirliyinin son hesabatına əsasən, ölkənin ümumi milli borcu tarixdə ilk dəfə olaraq 37 trilyon dolları keçib. Bu hədd pandemiya öncəsi proqnozlardan illərlə əvvəl əldə olunub. Konqres Büdcə İdarəsinin 2020-ci il yanvar proqnozlarına görə, borcun bu səviyyəyə yalnız 2030-cu ildən sonra çatacağı gözlənilirdi. Lakin COVID-19 pandemiyası dövründə iqtisadiyyata dəstək məqsədilə böyük həcmdə borclanma, həmçinin respublikaçıların bu il qəbul etdiyi vergi endirimləri və əlavə xərclər prosesi sürətləndirib.

Maliyyə ekspertləri bildirirlər ki, dövlət borcunun artması faiz dərəcələrinə təzyiq göstərərək kreditləri bahalaşdırır, özəl sektorun investisiya imkanlarını məhdudlaşdırır və inflyasiya təzyiqlərini gücləndirir.

Peterson Fondunun rəhbəri Maykl Peterson qeyd edib ki, ABŞ artıq hər 5 ayda 1 trilyon dollar əlavə borc yığır və bu, son 25 ilin orta göstəricisindən iki dəfə sürətlidir.