X sosial media platformasının sahibi İlon Mask, Apple şirkətini hüquqi addımlar atmaqla hədələyib. O, texnologiya nəhənginin App Store-da tətbiqlərin ChatGPT istehsalçısı OpenAI ilə rəqabət aparmasını “mümkünsüz” etdiyini iddia edib. Mask, həmçinin OpenAI rəhbəri Sem Altmanı “yalançı” adlandırıb.

Mübahisə, hər iki milyarderin ortaq təsisçisi olduqları OpenAI-dən Maskın ayrılmasından sonra başlayan və uzun müddətdir davam edən gərginliyin növbəti mərhələsi kimi qiymətləndirilir.

Mask daha sonra Apple-ın App Store-un “Must Have” bölməsində X və onun süni intellekt tətbiqi “Grok”u niyə təşviq etmədiyini sorğulayıb. Onun sözlərinə görə, X dünyada “ən çox istifadə olunan xəbər tətbiqi”, Grok isə “bütün tətbiqlər arasında ilk beşlikdə” yer alır.

Mask və Altman arasındakı münasibət illər əvvəl OpenAI-nin quruluş prinsiplərinin dəyişdirilməsi ilə bağlı fikir ayrılıqlarından başlayıb. Mask, şirkətin açıq mənbə və “bəşəriyyətin xeyrinə” işləmək prinsiplərindən uzaqlaşdığını iddia edir.