Gürcüstanda Avropa İttifaqına üzvlük əleyhinə qərar və repressiyalar kütləvi etirazlara səbəb olub.
Gürcüstanda 2024-cü ildən bəri hökumətin Avropa İttifaqına üzvlük danışıqlarını dayandırması ilə başlayan kütləvi etiraz aksiyaları ölkədə artan repressiyalar fonunda davam edir. Aksiyalarda iştirak edən vətəndaşlar, hüquq müdafiəçiləri və jurnalistlər müxtəlif üsullarla təzyiqlərə məruz qalır, yüz minlərlə dollar məbləğində cərimələnir və həbs edilir.

Etirazçı Qota Çanturiya ötən ilin noyabrından bu yana hər gün parlament qarşısında keçirilən aksiyalarda iştirak edir. Müəllim olan Çanturiya bildirib ki, bu müddət ərzində 56 dəfə cərimələnib və ümumi məbləğ 110 min ABŞ dollarını keçib. O, bu cərimələri ödəmək fikrində olmadığını deyib, baxmayaraq ki, yeni qanunlara əsasən, cərimələrin ödənilməməsi həbs cəzası ilə nəticələnə bilər.

Məlumatına görə, 2024-cü ilin aprelindən 2025-ci ilin avqustuna qədər etirazlarla əlaqədar azı 76 nəfərə qarşı cinayət təqibi başladılıb, onlardan 60-dan çoxu hazırda həbsdədir.

Hüquq-mühafizə orqanları bəzi QHT-lərin hesablarını dondurub, onları etirazçılara qoruyucu ləvazimatlar verməkdə və "sabotaj" təşkil etməkdə ittiham edib. Qurumlar isə bildirir ki, bu vasitələr jurnalistlərin təhlükəsizliyi üçün nəzərdə tutulub.

Hökumətin sərt tədbirləri beynəlxalq təşkilatlar və yerli hüquq müdafiəçiləri tərəfindən Gürcüstanın Rusiyanın avtoritar modelinə yaxınlaşması kimi qiymətləndirilir. Hökumətin tənqidçilərinə görə, məqsəd azad media, QHT-lər və müstəqil vətəndaş cəmiyyətini sıradan çıxarmaqdır.

Baş nazir İrakli Kobaxidze bəyan edib: “Radikal müxalifətin, xarici təsirlərin və onların çətiri altında olan hər kəsə qarşı məhkəmə iddiası qaldırılacaq.”