Çin sənayesi qlobal bazarda mövqeyini gücləndirir və Avropa moda evləri üçün ciddi rəqabət mühiti yaradır. Bu barədə Financial Times nəşri yazır.

Məlumata görə, İtaliyanın Prada brendi Honq-Konqda birjada yerləşdirildikdən on il sonra Çin yüksək moda markası Icicle Parisdə ilkin ictimai təklif (IPO) imkanını nəzərdən keçirir. Bu addım Çinin ucuz saxta məhsullar mərkəzindən innovasiya və yüksək keyfiyyətli istehsal ölkəsinə çevrildiyini göstərir.

Son illərdə Çin yalnız moda sahəsində deyil, həm də elektromobil və texnologiya sektorunda diqqət çəkir. Məsələn, BYD elektromobilləri və süni intellekt startapları ölkənin texnoloji gücünü nümayiş etdirir. Eyni zamanda, “guochao” – yəni “milli trend” siyasəti çərçivəsində yerli brendlərə dövlət dəstəyi artırılıb və bu da mədəni özünəinamın güclənməsinə səbəb olub.

Bu gün “China chic” anlayışı moda, zinət əşyaları, lüks avtomobillər və hətta premium şərab sektorunu əhatə edir. Vaxtilə yalnız kommunist liderlər üçün nəzərdə tutulan Hongqi avtomobilləri indi ölkənin milyarderlərinə xidmət göstərir.
Analitiklər bildirirlər ki, Çin brendlərinin əsas üstünlüklərindən biri daha münasib qiymət siyasətidir. Məsələn, yerli istehsal olan çantaya 500 dollar xərcləmək, eyni məhsula görə Avropa brendinə on dəfə artıq vəsait ödəməkdən daha sərfəli hesab olunur. Bundan əlavə, Çin şirkətləri bahalı Paris və ya Milan küçələrində flaqman mağazalar açmadan fəaliyyət göstərə bilir və daha aşağı xərclərlə işləyir.

Eyni zamanda, Çin şirkətləri mənfəət marjasını azaltmağa daha meyillidir. Araşdırmalara görə, pərakəndə satış qiymətləri məhsulun maya dəyərindən təxminən 4–5 dəfə yüksək olur ki, bu da Avropa rəqibləri ilə müqayisədə təxminən iki dəfə azdır.
Çin brendləri yerli irsə və ənənəvi motivlərə də xüsusi önəm verir. Muzeylərə marağın artması və tarixi dəyərlərə qayıdış bu yanaşmanı daha da populyarlaşdırır.

Bəzi Çin şirkətləri artıq beynəlxalq bazara çıxış əldə edib. Məsələn, Bosideng Londonda flaqman mağaza açıb və Fransada satış həyata keçirir. Bu isə Çin brendlərinin qlobal miqyasda böyümə potensialını göstərir.

Avropa lüks qrupları da Çin bazarına erkən investisiya yatırmağa başlayıb. LVMH 2020-ci ildə Tiffany brendini satın alıb və Çində şərab layihələrinə sərmayə qoyub. Bundan başqa, Kering qrupu Çin zərgərlik markası Qeelin-i əldə edib.
Sürətlə yüksələn Çin zərgərlik evi Laopu Gold hazırda təxminən 18 milyard dollar bazar kapitallaşmasına malikdir. Bu göstərici 2024-cü ildəki 1 milyard dollardan az səviyyə ilə müqayisədə kəskin artım deməkdir.

Mütəxəssislər hesab edirlər ki, Çin lüks brendlərinin sürətli inkişafı fonunda Avropa moda evləri artıq bu rəqabəti nəzərə almadan fəaliyyət göstərə bilməz. Çin lüks sənayesi qlobal bazarda yeni güc mərkəzinə çevrilməkdədir.