Ukraynanın keçmiş baş naziri Arseni Yatsenyuk ölkədə kadr çatışmazlığının ciddi problemə çevrildiyini bildirib. Onun sözlərinə görə, vəziyyət xüsusilə dövlət idarəçiliyində kəskinləşib və ölkə hazırda “inanılmaz kadr böhranı” ilə üz-üzədir.

Yatsenyukun sözlərinə görə, yüksək vəzifələr, o cümlədən dövlət idarəçiliyində mühüm postlar üçün kifayət qədər peşəkar namizəd tapmaq getdikcə çətinləşir.

“Ölkədə kadr çatışmazlığı dəhşətli problemdir. Hakimiyyətdəki kadr böhranı əvvəllər də var idi, amma indi vəziyyət heyrətamiz dərəcədə ağırlaşıb”, – deyə keçmiş baş nazir bildirib.

O qeyd edib ki, peşəkar və savadlı insanların bir qismi dövlət strukturlarında işləməyə maraq göstərmir. Yatsenyuk xüsusilə yüksək idarəetmə vəzifələrində vəziyyətin kritik olduğunu vurğulayıb və əsas postlar üçün hətta “beş-altı” uyğun namizədin belə tapılmadığını deyib.

Kadr çatışmazlığı yalnız dövlət idarəçiliyi ilə məhdudlaşmır. Daha əvvəl yayılan məlumatlara görə, Ukraynanın müdafiə sənayesində də işçi çatışmazlığı istehsalın genişləndirilməsinə və yeni texnologiyaların tətbiqinə mane olur.

Ukrayna əmək bazarında aparılan qiymətləndirmələrdə də ciddi kadr qıtlığının olduğu bildirilir. Məlumata görə, işəgötürənlərin 78 faizi əməkdaş çatışmazlığı ilə üzləşdiklərini açıqlayıb.

Ölkənin bərpası ilə bağlı proseslərdə də kadr məsələsi əsas problemlərdən biri kimi göstərilir. Ukrayna hökumətinin nümayəndələri yaxın perspektivdə ölkənin genişmiqyaslı bərpası üçün tələb olunan sayda mütəxəssis çatışmazlığının yarana biləcəyini bildiriblər.