Türk Dünyası Sivil Toplum Konfransı: TÜRKSİT başqanı “Ankara’da Ortak Gələcəyin Yol Xəritəsi”nə diqqət çəkdi

Bakı/Ankara, 10 Aprel 2025 —
Azadmedia.az


Türk dünyasının müxtəlif coğrafiyalarından gələn sivil toplum təşkilatları, Ankara Ticaret Odası’nın ev sahibliyində keçirilən “Türk Dünyası Sivil Toplum Konfransı”nda bir araya gəldi.

Belə ki, 2025-ci ilin aprelində Ankara bir daha təkcə siyasi və iqtisadi mərkəz deyil, həm də mədəni və mənəvi birliyin səsi olan paytaxt kimi diqqət çəkdi.

Azadmedia.az xəbər verir ki, Türk Dünyası Sivil Toplum İşbirliği Dərnəyi (TÜRKSİT), İpəkyolu Kamu Diplomasisi Təşkilatı və EkoAvrasya Vəqfi tərəfindən təşkil olunan bu konfrans, Türk dünyasında sivil toplum qurumlarının (QHT) koordinasiyasını gücləndirmək, ortaq strategiyalar inkişaf etdirmək və regional dayanışmanı artırmaq məqsədi daşıyırdı.

Konfransda AK Partiya sədrinin müavini və Türk Dövlətləri ilə Əlaqələr rəhbəri Kürşad Zorlu, TBMM MHP Qrup sədr müavini Filiz Kılıç, Azərbaycan Milli Məclisinin millət vəkili Tenzilə Rüstəmxanlı, AK Partiya İstanbul Millət vəkili Şamil Ayrım, Ankara Ticarət Palatası İdarə Heyətinin sədri Gürsəl Baran, TÜRKSİT İdarə Heyətinin başqanı Kemal Kurnaz, İpekyolu Xalq Diplomatiyası Təşkilatı Başçısı Seyfullah Türksoy, EkoAvrasya sədri Hikmət Eren, iş insanları və media nümayəndələri iştirak edib.

Ankara Ticarət Odasında keçirilən “Türk Dünyası Sivil Toplum Konfransı”nda çıxış edən Türk Dünyası Sivil Toplum İşbirliyi Dərnəyinin (TÜRKSİT) başqanı Kemal Kurnaz, tədbirin təkcə bir dialoq platforması deyil, həm də “ortaq gələcəyin yol xəritəsi”nin müəyyənləşdiyi strateji mərhələ olduğunu vurğulayıb.

TÜRKSİT başqanı Kemal Kurnaz açılış nitqinə Yunus Əmrənin məşhur “Gəl, tanış olaq” misraları ilə başlayıb. Bu xətt təkcə ədəbiyyat nümunəsi deyil, həm də türk dünyasının gələcəyinin açarı olan bir fəlsəfədir. O, öz çıxışında bildirib: "Vətəndaş cəmiyyəti olaraq bu günü deyil, gələcəyi quran əllər olmalıyıq. Müxtəlif dillərdə danışsaq da, eyni kökün budaqlarıyıq. Bu konfrans həmin kökün dirçəlməsi və yeni bəhrələr verməsi üçün münbit məkan olacaq".

Başqan Kurnaz, çıxışı zamanı Türk dünyasında sivil toplum qurumlarının koordinasiyalı şəkildə hərəkət etməsinin vacibliyinə toxunaraq bildirib:
“Bu konfrans, yalnız bu günü deyil, sabahı da düşünənlər üçün bir çağırışdır. Ankara, bu görüş ilə Türk dünyasının ortaq gələcək vizyonuna işıq tutan bir yol xəritəsinin başlanğıc nöqtəsinə çevrildi.”

Kemal Kurnaz qeyd edib ki, “Türk dünyasının geniş coğrafiyası Altay dağlarından Balkanlara, Xəzər dənizindən Aral dənizinə qədər uzanan mənəvi-mədəni coğrafiyadır. Bu böyük ailənin ortaq dilindən, ruhundan, tarixindən doğan bir çağırış var: “Bir olaq, diri olaq, böyük olaq!”. Bu çağırışın vətəndaş cəmiyyəti səviyyəsində konkret addımlara çevrilməsi üçün “Türk Dünyası Vətəndaş Cəmiyyəti Konfransı” mühüm dönüş nöqtəsi kimi tarixə düşəcək”.

Başqan Kurnaz həmçinin vurğulayıb ki, fərqli ölkələrdən gələn nümayəndələrin bir masa ətrafında toplanması, artıq təkcə mədəni yaxınlıq deyil, ortaq məqsədlərə yönəlmiş əməli işbirliklərinin zəruriliyini gündəmə gətirir.

TÜRKSİT Başqanı Kemal Kurnaz çıxışının sonunda Türk dünyasının sivil gücünün “emosiyalardan planlı addımlara keçid etməsinin zamanıdır” deyərək, bu yol xəritəsinin reallaşdırılmasında ortaq bir dilin önəmini vurğulayaraq, bütün iştirakçı qurumları fəal olmağa çağırıb.

Konfransda təqdim edilən təkliflər arasında həmçinin ortaq təhsil proqramlarının qurulması, mədəni diplomatiyanın gücləndirilməsi, diaspor gücünün strateji resursa çevrilməsi və texnoloji əməkdaşlıq istiqamətində konkret addımların atılması yer alıb.

Nəzərinizə çatdıraq ki, Qloballaşan Dünyada Türklük Xaricdə yaşayan milyonlarla türk əsilli insan artıq sadəcə bir etnik qrup deyil, onlar ortaq tarixə və irsə malik qlobal gücə çevrilirlər. Seminarda əsas müzakirə mövzularından biri bu insan resursunun vətəndaş diplomatiyası üçün strateji qüvvəyə necə çevrilə biləcəyi olub. Türk diasporunun mədəniyyət elçilərinə çevrilməsi üçün mexanizmlər təklif edilib.

Nəhayət, belə bir sual yaranır: Nə üçün bu qədər müxtəlif vətəndaş cəmiyyəti təşkilatlarını bir masa ətrafında topladıq? Çünki eyni kökə malik olanların ümumi gələcəyi qurmaq məsuliyyəti var.

Qeyd edək ki, Türk dünyasının sivil gücü artıq sadəcə bir varlıq nümayişi deyil; Bu, tarixi istiqamətləndirəcək bir iradədir.