Ümumdünya Səhiyyə Təşkilatının (ÜST) baş direktoru Tedros Adhanom Gebreyesus oktyabrın 7-dən bəri işğal altındakı Fələstin torpaqlarında sağlamlıq mərkəzlərinə 218 hücum edildiyini təsdiqlədiklərini qeyd edib.
Azadmedia.az xəbər verir ki, ÜST-nin həftəlik mətbuat konfransında danışan Gebreyesus İsrail ilə Fələstin arasında oktyabrın 7-də başlayan qarşıdurmalar nəticəsində 8 min 500-dən çoxu Qəzzada, 1400-ü İsraildə 10 mindən çox insanın həyatını itirdiyini bildirib.
Belə ki, Gebreyesus "Qəzzada 21 mindən çox insan yaralanıb, 1 milyon 400 mindən çox insan isə didərgin düşüb. Qəzzada vəziyyət sözlə ifadə edilə bilməz. Xəstəxanalar dəhlizlərdə yatan yaralılarla, meyitxanalar dolub-daşır. Həkimlər anesteziyasız əməliyyatlar edirlər" deyib.

Həmçinin ÜST-nin indiyədək səhiyyə xidmətlərinə 237 hücumu təsdiqlədiyini qeyd edən Gebreyesus, bunlardan 218-nin işğal olunmuş Fələstin torpaqlarında, 19-nun isə İsraildə baş verdiyini bildirib:

"Səhiyyə xidmətlərinə hücumlar beynəlxalq humanitar hüququn pozulmasıdır. Qəzza zolağında 36 xəstəxanadan 14-ü işlək vəziyyətdə deyil. Xəstəxanaların funksionallığına qida çatışmazlığı, təmiz su və generatorlar üçün yanacağın olmaması təsir edir. Səhiyyə sahəsində ehtiyacı artdıqca bu ehtiyacları ödəmək imkanımız azalır”.