“Mançester Siti” “Çelsi”nin yarımmüdafiəçisi Enzo Fernandes üçün 125 milyon funt-sterlinq ödəməyə razılaşıb. Bu məbləğ İngiltərə futbolunda birgə transfer rekordu hesab olunur.

Fernandes 2023-cü ildə “Benfika”dan “Çelsi”yə 107 milyon funt-sterlinqə keçmişdi. Bu transfer həmin dövr üçün Britaniya rekordu idi. İndi argentinalı futbolçunun “Mançester Siti”yə keçidi ötən yay transferin son günündə “Liverpul”un Aleksandr İsak üçün ödədiyi 125 milyon funtla eyni məbləğdədir.

Klublar son 24 saat ərzində danışıqlar aparıb və artıq razılığa gəliblər.

25 yaşlı Fernandes “Mançester Siti”də uzunmüddətli müqavilə imzalamazdan əvvəl tibbi müayinədən keçəcək. Onun şəxsi müqavilə şərtləri ilə bağlı problemin olmayacağı bildirilir.

Argentina millisinin üzvü Fernandes İtaliyalı baş məşqçi Enzo Mareskanın “Çelsi”də çalışdığı dövrdə onun rəhbərliyi altında oynayıb. Mareska bu yay bir sıra yarımmüdafiəçiləri itirdikdən sonra Fernandeslə yenidən işləməkdə maraqlıdır.

Fernandes bazar günü “Çelsi”nin “Brayton” üzərində 4:3 hesablı Premyer Liqa qələbəsində, həmçinin üç gün əvvəl Liqa Kubokunda “Luton”a qarşı 2:0 hesablı oyunda iştirak etməyib. Argentina mətbuatında yayılan xəbərlərə görə, futbolçu heyətə daxil edilməməsini özü istəyib.

“Çelsi” klublara təkliflərini təqdim etmək üçün son tarix kimi avqustun 14-də saat 17:00-ni müəyyənləşdirmiş və 120 milyon funt və daha çox təklif tələb etmişdi. Məqsəd 2026/27 mövsümü başlamazdan əvvəl futbolçunun gələcəyi ilə bağlı qeyri-müəyyənliyə son qoymaq olub.

Bu, “Mançester Siti”nin bu yay öz transfer rekordunu ikinci dəfə yeniləməsidir. Bundan əvvəl klub “Nottingem Forest”dən Elliot Andersonu 116 milyon funt-sterlinqə transfer etmişdi.

Fernandes bu yay Premyer Liqa klubuna ən azı 100 milyon funt qarşılığında keçən dördüncü futbolçu olacaq. Ondan əvvəl Morgan Rocers 117 milyon funt-sterlinqə “Çelsi”yə, Bredli Barkola 123 milyon funt-sterlinqə “Liverpul”a, Elliot Anderson isə 116 milyon funt-sterlinqə “Mançester Siti”yə keçib. //BBC