21 iyul 2024-cü il tarixində Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Məhsəti" Şairlər Məclisi İctimai Birliyinin təşkilatçılığı ilə "Ana Dilimizin Saflığı" adlı tədbir keçirilib.

Tədbir şəhidlərimizin ruhunu bir dəqiqəlik sükutla yad etməklə başlayıb. Məclisin sədri Cəvahir Qaraqızı giriş nitqi ilə çıxış edərək layihənin məqsəd və vəzifələrindən danışıb.

Azərbaycan Yazıçılar Birliyi və Azərbaycan Jurnalistlər Birliyinin üzvü, Prezident təqaüdçüsü şair və publisist, filoloq Zərifə Mikayılova çıxışında ana dilimizin cəmiyyətdə qorunmasının vacibliyini vurğulayıb. Qiraət ustası və həvəskar şair Cəbrayıl Qəmbər isə dilimizin tarixi və dəyəri haqqında maraqlı faktları tədbir iştirakçıları ilə bölüşüb.

Şairlər Mehin Qasımlı, Sədaqət Şıxlı, Əzizə Hüseynova və Qəzənfər Məsimoğlu öz şeirləri ilə ana dilimizin gözəlliklərini iştirakçılara çatdırıblar.

Qarabağ qaziləri Qurban Göyçəli, İsa Qazaxlı, Qabil Göyçəli və Zaur "Məhsəti" Şairlər Məclisinin diplomları ilə təltif olunub, qiraət ustası İlahə xanım isə "Heydər Zirvəsi" diplomuna layiq görülüb.

Tədbirdə cəmiyyətin aktiv nümayəndələrindən olan Sevil Əzizova da çıxış edərək layihəyə uğurlar diləyib. Aşıq və şair Həqiqət Şınıxlı və şair Hənifə Orucova da şeirləri ilə tədbirə töhfələr verib. Xüsusilə, Hənifə xanımın şəhidlərimizə həsr etdiyi şeir tədbir iştirakçılarını kövrəldib.

Tədbirin sonunda "Məhsəti" Şairlər Məclisi İctimai Birliyinin sədri Cəvahir Qaraqızı bütün iştirakçılara fəal iştiraka görə təşəkkürünü bildirib.