Təmas” Regional İnkişaf İctimai Birliyi Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Bölgələrdə gender əsaslı zorakılıq qurbanları ilə iş və ictimai maarifləndirmə" layihəsinin icrasına başlayıb.

QHT.az xəbər verir ki, bu layihə, Azərbaycanın qərb bölgəsində insan alveri və insan alverinin potensial qurbanlarına xidmət göstərən regional reabilitasiya və reinteqrasiya mərkəzinin (sığınacağın) davamlı fəaliyyətinin təmin edilməsini və orta məktəblərdə ictimai maarifləndirmə fəaliyyətinin təşkil olunmasını hədəfləyir. Layihənin əsas vəzifələri:

Qərb bölgəsində yeganə gender əsaslı zorakılıqdan zərər çəkmiş qadın və uşaqlara yardım göstərən Mərkəzin (sığınacağın) davamlı fəaliyyətinin təşkil edilməsi, sakinlərin ərzaqla təmin edilməsi və ilkin ehtiyaclarının ödənilməsi.
Məişət zorakılığından zərər çəkmiş qadın və uşaqların effektiv reabilitasiyası və cəmiyyətə reinteqrasiyasına kömək göstərilməsi.
Təhsilə bərpa olunmuş uşaqların dərslərə davam etməsinə, sığınacaqda qidalanmasına, asudə vaxtlarının səmərəli təşkil olunmasına, bacarıqlarına uygun dərnək və kurslarda iştirak etmələrinə dəstəyin göstərilməsi.
Sığınacaqda yaşayan qadınların məşğulluğunun təmin edilməsi, iqtisadi cəhətdən gücləndirilməsi, özgüvən və özünə inam hissinin yüksəldilməsi, özlərinin bilik və bacarıqlarını müəyyən etmək üçün imkanların yaradılması.
Bölgədə ictimai maarifləndirmə fəaliyyətinin həyata keçirilməsi. Regionun seçilmiş 3 məktəbində (Gəncə şəhəri, Samux və Göygöl rayonları) "Ayrıseçkilik və onun formaları" mövzusunda maarifləndirmə sessiyalarının təşkil olunması.
Layihə 5 ay ərzində həyata keçiriləcəkdir.