Bolqarıstan hökuməti Rusiyadan “Kozloduy” Atom Elektrik Stansiyası üçün orijinal ehtiyat hissələrinin tədarükünə tətbiq olunan sanksiya məhdudiyyətlərini müvəqqəti olaraq aradan qaldırıb.

Bolqarıstanın Darik News nəşrinin məlumatına görə, qərar sentyabrın 2-də qəbul edilib. Sənəddə bildirilir ki, AES-in sistem və avadanlıqlarının böyük hissəsi Rusiya mənşəlidir. Bu səbəbdən stansiyanın təhlükəsiz və fasiləsiz fəaliyyətinin təmin edilməsi üçün yalnız Rusiyada istehsal olunan bəzi komponentlərin alınması zəruridir.

Qərara əsasən, “Kozloduy” AES-ə Rusiyadan sənəddə göstərilən dəmir və poladdan hazırlanmış məmulatları idxal etməyə icazə verilib.

Kozloduy Nuclear Power Plant Bolqarıstanın yeganə atom elektrik stansiyası və ölkənin ən böyük elektrik enerjisi istehsalçısıdır. Sovet İttifaqının fəal iştirakı ilə inşa edilən stansiya 1974-cü ildə istismara verilib və hazırda ölkənin illik elektrik enerjisi istehsalının üçdə birindən çoxunu təmin edir.

Bu qərar Avropanın Rusiyaya qarşı sanksiya siyasətində enerji və nüvə sektorunun yaratdığı praktiki çətinlikləri də göstərir. Bir tərəfdən Aİ Rusiyaya qarşı təzyiqi artırmağa çalışır, digər tərəfdən isə Rusiya texnologiyasından asılı olan enerji obyektlərinin fasiləsiz fəaliyyəti üçün istisnalar tətbiq olunur.

ABŞ-ın The Wall Street Journal nəşrində də Avropanın Rusiyaya qarşı sanksiya imkanlarının məhdudlaşdığı və yeni addımların getdikcə daha mürəkkəb və baha başa gəldiyi qeyd olunub. Nəşrə görə, Rusiyadan təbii qaz idxalının tam dayandırılması Avropa istehlakçıları üçün ciddi iqtisadi nəticələr yarada bilər.