Ərdoğan: Türkiyənin Rusiya və Şərqlə münasibətləri Qərbdən uzaqlaşmaq demək deyil

Türkiyə Prezidenti Rəcəb Tayyib Ərdoğan Ankaranın Şərq ölkələri ilə münasibətləri daha da inkişaf etdirmək istəyinin Qərblə əməkdaşlıqdan imtina anlamına gəlmədiyini bildirib.
Ərdoğan bu barədə Şanxay Əməkdaşlıq Təşkilatının (ŞƏT) Bişkekdə keçirilən sammitindən qayıdarkən jurnalistlərə açıqlamasında deyib.
Türkiyə lideri qeyd edib ki, ŞƏT-ə üzvlük perspektivi hər hansı blokla əlaqələrin kəsilməsi və ya Qərbə arxa çevrilməsi demək deyil.
Ərdoğan Türkiyənin ŞƏT-in tamhüquqlu üzvü olmaq niyyətini davam etdirdiyini vurğulayıb. Hazırda təşkilata Rusiya, Çin, Hindistan və İran da daxil olmaqla 10 ölkə daxildir.
Türkiyə Prezidenti sammit çərçivəsində Rusiya Prezidenti Vladimir Putinlə də görüşüb. Görüş zamanı, xüsusilə nüvə energetikası sahəsində gələcək əməkdaşlıq məsələləri müzakirə olunub.
Ukraynadakı vəziyyətə toxunan Ərdoğan Ankara və Moskvanın münaqişənin tezliklə sülh yolu ilə başa çatacağına ümid etdiyini bildirib. Onun sözlərinə görə, Türkiyə həm Rusiya, həm də Ukrayna ilə işgüzar münasibətlərini davam etdirir.

Türkiyə Prezidenti Qara dənizdə gəmiçiliyin təhlükəsizliyi məsələsinə də diqqət çəkib. O bildirib ki, mülki gəmilərə hücumların artdığı bir vaxtda kommersiya dəniz nəqliyyatının təhlükəsizliyini daimi şəkildə təmin edəcək mexanizm yaradılmalıdır.
Ərdoğan bunun yeni ərzaq böhranının qarşısının alınması baxımından da vacib olduğunu qeyd edib.

Xatırladaq ki, Türkiyə 2022-ci ildə Qara Dəniz Taxıl Təşəbbüsünün əldə olunmasında vasitəçi kimi çıxış edib. Razılaşma Ukrayna taxılının dəniz limanları vasitəsilə ixracına imkan yaradıb. Rusiya isə bir il sonra sazişdən çıxıb.
Şanxay Əməkdaşlıq Təşkilatı 2001-ci ildə yaradılıb. Təşkilata Rusiya, Çin, Hindistan və İranla yanaşı, Qazaxıstan, Qırğızıstan, Tacikistan, Özbəkistan, Pakistan və Belarus daxildir.