Heydər Əliyev Mərkəzində Türkiyə Cümhuriyyətinin yaranmasının 99-cu ildönümü qeyd edilib.

Azadmedia.az xəbər verir ki, tədbirdə Türkiyənin Azərbaycandakı səfiri Cahit Bağçı və Milli Məclisin sədri Sahibə Qafarova iştirak ediblər.

Belə ku, “Türkiyə dünyanın bütün bölgələrində sülh və təhlükəsizliyi təşviq etməyə çalışan böyük bir ölkədir. Biz kənd təsərrüfatından tutmuş texnologiyaya qədər bütün sahələrdə mühüm uğurlar əldə etmişik”, - səfir Türkiyə Prezidenti Rəcəb Tayyib Ərdoğanın müraciətini oxuyaraq bildirib.

Səfir Cahid Bağcı qeyd edib ki, Türkiyə və Azərbaycan beynəlxalq arenada, xüsusilə Qarabağ məsələsində hər zaman bir-birini dəstəkləyir. O, bir daha qardaş Azərbaycanı işğal olunmuş torpaqlarının azad edilməsi münasibətilə təbrik edib.

“Qafqazda sülh üçün fürsət yaranıb və bu, təkcə region üçün deyil, bütün dünya üçün faydalı olacaq. Nəqliyyat və logistika marşrutlarının açılması ilə yeni imkanlar yaranacaq”, - səfir əlavə edib.

Sahibə Qafarova, öz növbəsində: “Türkiyə qlobal məsələlərdə hər zaman balanslı və ədalətli mövqe nümayiş etdirir ki, bu da dünyada sabitləşdirici rol oynayır. İkinci Qarabağ müharibəsi zamanı Türkiyənin dəstəyi göstərdi ki, Azərbaycan tək deyil, qardaş ölkənin xalqı hər zaman bizimlədir. Türkiyə Azərbaycanla bütün sahələrdə, xüsusən də işğaldan azad edilmiş ərazilərin yenidən qurulmasında əməkdaşlığı inkişaf etdirir”. - Türkiyənin Cənubi Qafqazda oynadığı geosiyasi rolu qeyd edib.