Rusiya: Bir gecədə 272 Ukrayna pilotsuz aparatı vurulub

Rusiya Müdafiə Nazirliyi bildirib ki, iyunun 4-nə keçən gecə ölkənin müxtəlif bölgələri üzərində Ukraynaya məxsus 272 təyyarə tipli pilotsuz uçuş aparatı (PUA) aşkarlanaraq məhv edilib.

Məlumata görə, hava hədəfləri iyunun 3-ü saat 20:00-dan iyunun 4-ü saat 07:00-dək hava hücumundan müdafiə vasitələri tərəfindən zərərsizləşdirilib.

Nazirlik qeyd edib ki, pilotsuz aparatların əksəriyyəti Belqorod, Bryansk, Volqoqrad, Voronej, Kursk, Nijni Novqorod, Oryol, Rostov, Ryazan və Tambov vilayətləri, həmçinin Krım yarımadası üzərində, eləcə də Azov və Qara dəniz akvatoriyalarında vurulub.

Rusiya tərəfinin məlumatına görə, həmin gecə Krım da genişmiqyaslı hücuma məruz qalıb. Sevastopolun şimal hissəsində, Streletskaya buxtasında və İnkerman ərazisində 20-dən çox hava hədəfinin məhv edildiyi bildirilib.

İlkin məlumata əsasən, vurulan pilotsuz aparatların qalıqları Sevastopolun şimalındakı bağ sahələrindən birinə düşüb, Krımın Fruktovoye kəndində isə fərdi yaşayış evinin fasadına ziyan dəyib.

Simferopolda qeyri-yaşayış obyektlərinə zərbə nəticəsində üç nəfərin həlak olduğu, daha yeddi nəfərin isə yaralandığı qeyd olunur.

Bundan əvvəl Krımda hava təhlükəsi səbəbindən dəmir yolu nəqliyyatının hərəkəti müvəqqəti dayandırılmışdı. Məqalədə yer alan məlumatlar əsasən Rusiya rəsmilərinin açıqlamalarına əsaslanır.