Stress qadınlarda ürəyin sürətlə qocalmasının əsas amillərindən biridir, genetika isə ömür uzunluğunun və sağlamlığın 30-40%-ni müəyyən edir. Bu barədə Kaliforniya Dövlət İnstitutunun Tibb və Səhiyyə Tarixi şöbəsinin əməkdaşı və ürək cərrahı Sandra Eyfer xəbərdarlıq edib.

Mütəxəssisin sözlərinə görə, işdə və ailə həyatında gözləntiləri daim qarşılamaq ehtiyacı ürəyin və beynin sağlamlığına, eləcə də bədənin hormonal balansına mənfi təsir göstərir. Xroniki stressin qadınlara təsiri xüsusilə nəzərə çarpır.

"Qadınların daha uzun yaşamalarına imkan verən bəzi üstünlükləri var - iki X-xromosom, uzun telomerlər, daha sabit mitoxondriya (hüceyrələrin enerji stansiyaları) və güclü immun sistemi. Lakin qadınlarda eyni stress faktoru qan təzyiqi, ürək döyüntüsü və hormonal fon kimi daha güclü reaksiyaya səbəb olur", Eyfer izah edib.

Həkim aydınlaşdırıb ki, genetika ömür uzunluğunu və sağlamlıq vəziyyətini 30-40% müəyyən edir. Artıq 45 yaşında hormonal dəyişikliklər başlayır və estrogenin (qadın cinsi hormonu) qoruyucu təsiri tədricən itir. 60 yaşında yığılmış stressin nəticələri özünü göstərməyə başlayır.

"45 yaşdan sonra zehni sağlamlığın qorunmasına xüsusi diqqət yetirmək vacibdir. Bu yaşda əlavələrə deyil, sağlam həyat tərzi prinsiplərinə - düzgün qidalanma və fiziki fəaliyyətə etibar etməlisiniz. Həmçinin ürəyi stressdən qorumaq üçün perfeksionizmdən imtina etmək lazımdır", - deyə ekspert yekunlaşdırıb.