ABŞ dövlət katibi Marko Rubio bildirib ki, İran Vaşinqtonla saziş bağlamaqda “ciddi” niyyət göstərir. Lakin onun sözlərinə görə, bu prosesdə əsas maneə ölkə daxilində mövcud fikir ayrılıqlarıdır.

Fox News telekanalına müsahibəsində Rubio qeyd edib ki, İranın danışıqlar aparan nümayəndələri tez-tez ölkə daxilindəki digər güc mərkəzləri ilə eyni mövqedə olmur. Bu isə sülh danışıqlarının imkanlarını məhdudlaşdırır.

Onun sözlərinə görə, sərt xətt tərəfdarları arasında təkcə İslam İnqilabı Keşikçiləri Korpusu deyil, həm də ali rəhbərlik və onun ətrafı yer alır. Eyni zamanda, siyasi elita, o cümlədən hökumət nümayəndələri və iqtisadi dairələr ölkənin iqtisadi vəziyyətinin yaxşılaşdırılmasının vacibliyini anlayır ki, bu da daxildə müəyyən gərginlik yaradır.

Rubio vurğulayıb ki, Tehran mövcud çətin vəziyyətdən çıxmaq üçün razılaşmada maraqlıdır. O bildirib ki, ölkənin əvvəlki problemləri hələ də qalır və hətta daha da dərinləşib, üstəlik İranın hərbi potensialı da zəifləyib.

Mümkün ssenarilərə toxunan ABŞ dövlət katibi əlavə edib ki, əgər saziş əldə olunmasa, İrana qarşı təzyiqlər daha da artırıla bilər.