Le Pen Ukrayna münaqişəsinin NATO və Aİ olmadan həllinə dair konfrans keçirməyə çağırıb

Fransa parlamentində sağçı “Milli mitinq” partiyasının lideri Marin Le Pen Ukrayna münaqişəsinin həlli ilə bağlı Avropa ölkələrinin iştirakı ilə, lakin NATO və Aİ-nin dövlətlərüstü qurumlarının nümayəndələrinin iştirakı olmadan konfrans keçirməyi təklif edib. Bu barədə RİA Novosti məlumat yayıb.

“NATO və Aİ kimi dövlətlərüstü qurumlar olmadan sülh konfransı təşkil etmək və xalqları danışıqlar masası arxasına çəkmək lazımdır”. "Regionda sabitləşmədə maraqlı olan dövlətlər: təbii ki, Ukrayna və Rusiya, ABŞ və Fransa, Türkiyə və Almaniya, Rumıniya, Macarıstan, Polşa, Moldova, Litva, Latviya, Estoniya, Finlandiya, Slovakiya, Çexiya, İsveç, Norveç, İtaliya, Bolqarıstan", - siyasətçi Ukraynadakı vəziyyətlə bağlı parlament qarşısında çıxış edərkən deyib.

O qeyd edib ki, bu ölkələrin siyahısı tam deyil.

Mart ayında Fransa prezidenti Emmanuel Makron Ukrayna ilə bağlı ABŞ və Rusiyanın razılaşdıra biləcəyi mümkün razılaşmaya şübhə ilə yanaşdığını bildirib. Onun fikrincə, belə bir razılaşmanın bağlanması ilə belə, tam atəşkəs rejiminə əməl olunmasına effektiv nəzarəti təmin etmək praktiki olaraq mümkün olmayacaq.

Alternativ olaraq, Fransa lideri Britaniyanın baş naziri Keir Starmer ilə birlikdə hava məkanında, su hövzələrində və enerji obyektlərində hərbi əməliyyatların müvəqqəti (30 gün müddətinə) dayandırılması təşəbbüsü irəli sürüb.