ABŞ prezidenti Donald Trampın xüsusi nümayəndəsi Keyt Kelloq bildirib ki, Ukrayna hakimiyyəti Rusiya ilə cəbhə xətti boyunca münaqişəni “dondurmaq” və demilitarizasiya zonası yaratmaq istəyir. Bu barədə o, Fox News-a müsahibəsində bildirib.

"Ukraynalılar dondurulmasını, hazırkı xətt üzrə atəşkəsin olmasını, sonra isə silahsızlaşdırılmış zona yaratmaq istəyirlər", - Kelloq deyib.

Onun sözlərinə görə, belə bir vəziyyətdə Ukrayna Silahlı Qüvvələri 15 km-ə qədər geri çəkilə bilər və Rusiya ordusunun da bunu edəcəyi gözlənilir. Bu halda 30 kilometrlik hərbsizləşdirilmiş zona formalaşacaq, bunun üçün "nəzarət edə bilərsiniz", - Kelloq yekunlaşdırıb.

Aprelin 28-də Rusiya prezidenti Vladimir Putin Qələbənin 80-ci ildönümü münasibətilə atəşkəs elan edib. Dövlət başçısının tapşırığına əsasən, atəşkəs rejimi mayın 7-dən 8-nə keçən gecə yarısından 10-dan 11-nə keçən gecə yarısına qədər davam edəcək. Bu müddət ərzində Putin bütün hərbi əməliyyatları qadağan edib.

Mayın 3-də Ukrayna prezidenti Vladimir Zelenski Rusiya liderinin 9 May şərəfinə müvəqqəti atəşkəs ideyasını rədd edib. O, həmçinin bildirib ki, Kiyev Qələbə Gününü qeyd etmək üçün Moskvaya gələcək dünya liderlərinin təhlükəsizliyinə zəmanət verə bilməz.