26 avqust – Laçın şəhərinin işğaldan azad olunmasının ildönümü Azərbaycanın dövlətçilik tarixində xüsusi əhəmiyyət kəsb edən günlərdən biridir. Bu tarix yalnız hərbi və siyasi baxımdan deyil, həm də azad edilmiş torpaqlarda həyata keçirilən bərpa, yenidənqurma və sosial-iqtisadi inkişaf tədbirləri ilə mühüm əlamətdar gün kimi yadda qalır.

Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə azad edilmiş Laçında sürətli quruculuq və abadlıq işləri həyata keçirilir. Dövlət proqramlarına uyğun olaraq şəhərin tamamilə yeni siması formalaşdırılır, müasir infrastruktur yaradılır, vətəndaşların qayıdışı üçün zəruri sosial şərait təmin olunur.

İlk mərhələdə Laçında elektrik, içməli su, qaz və rabitə xətləri bərpa olunmuş, şəhərə gedən yollar yenidən qurulmuşdur. Yeni yaşayış kompleksləri, məktəblər, uşaq bağçaları, xəstəxana və digər sosial obyektlər tikilir. Prezidentin göstərişinə əsasən Laçında “Ağıllı şəhər” və “Ağıllı kənd” layihələrinin tətbiqi sürətlə həyata keçirilir ki, bu da rayonun gələcək inkişafına dayanıqlı əsas yaradır.

Laçında aparılan işlərin mühüm istiqamətlərindən biri də istehsal müəssisələrinin yaradılmasıdır. Əhalinin məşğulluğunu təmin etmək və iqtisadi fəaliyyəti canlandırmaq məqsədilə müxtəlif sənaye və emal sahələrinin qurulması diqqət mərkəzindədir.

Xüsusilə kənd təsərrüfatı məhsullarının emalı, yeyinti sənayesi, tikinti materiallarının istehsalı və digər sahələr üzrə müəssisələrin açılması planlaşdırılır. Bu müəssisələr bir tərəfdən regionun sosial-iqtisadi inkişafına təkan verəcək, digər tərəfdən isə yerli və ixrac bazarlarına məhsul təklif etməklə ölkə iqtisadiyyatına töhfə verəcəkdir.

Artıq Laçına qayıdan ailələr müasir evlərlə təmin olunur. Yeni yaradılan iş yerləri və iqtisadi imkanlar onların sosial rifahının yaxşılaşdırılmasına xidmət edir. Geniş miqyaslı quruculuq və istehsal sahələrinin inkişafı Laçının tarixi ənənələrinin bərpasına və müasir iqtisadi mərkəzə çevrilməsinə zəmin yaradır.

Azərbaycan dövləti tərəfindən həyata keçirilən məqsədyönlü siyasət nəticəsində Laçın yaxın illərdə Cənubi Qafqazda nümunəvi bir şəhərə çevriləcək. Bu, həm bölgəyə qayıdan sakinlərin rifahını təmin edəcək, həm də ümumilikdə ölkəmizin iqtisadi qüdrətinin daha da möhkəmlənməsinə xidmət edəcəkdir.

26 avqust – Laçının işğaldan azad edildiyi gün bu torpaqlarda yeni həyatın başlanğıcı kimi tarixə həkk olunmuşdur. Dövlətimizin iradəsi, xalqımızın birliyi və görülən məqsədyönlü işlər nəticəsində Laçın qısa zamanda firavan, müasir və inkişaf etmiş bir şəhərə çevriləcəkdir.


Fariz Kərimov, YAP Masallı rayon təşkilatı, Həsənli ərazi partiya təşkilatının sədri.